Konferansê Kurdan ê Mîyanneteweyî yê 16. o ke Parlamentoya Ewropa ci rê meymandarîye kena roja diyîne de ya. Îşxalê dewleta tirke û DAÎŞ rojdemê konferansî yê.

Roniştişo destpêk ê roja diyîne hetê Evîne Încîr a ke Îtîfaqê Averşîyayîşî yê Sosyalîstan û Demokratan (S&D) ra ame îdarekerdene. Binê nameyê ''Îşxalê Tirkîya yê vera Rojawanî'' de rewşa Rojhelatê Mîyanênî ameye ercnayene.

Încîre vat: ''Komelê mîyanneteweyî babeta Rojawanî de xo kerr û lal kerd.'' Încîre vist vîrî ke Rojawan de pakîya etnîke yena kerdene.

Zanîngehê Tennesse yê DYA ra Kirmanc Gundî roja destpêke de qisey kerd û vat: ''Tirkîya wazena dewleta Osmanijan newe ra ganî bikera. Eke dewletanê mîyanneteweyan îşxalê Rojawanî tesdîq nêkerdêne na rewşe nêameyêne meydan. Seba qedînayîşê na polîtîkaya îşxalî ganî her kes pîya têbigêro.''

Îtîfaqê Kesk û Sûrî yê Danîmarka ra Soren Sondergaardî zî vat: ''Meseleya kurdan bi demokratîkbîyayîşê herême eşkena çareser biba. Ganî paştî bêro dayene vînayîşê konfederalîzmê demokratîkî. Ganî şerê vera Rojawanî bêro vindertene.''

Koma Çepe ya Yewbîyaye/ Çepa Keske ya Vakure (GUE/NGL) ra Leîla Chaîbî zî hêrişê DAÎŞî yê vera Fransa vistî vîrî û vat: ''Kurdan şerê vera DAÎŞî de bedelê giranî dayî. Coka Yewîya Ewropa û Fransa deyndarê kurdan ê. Her çi ra verî deynê ma yo demokratîk esto. Tecrubeyê Rojawanî seba Ewropa bi çimeyêk.''

Belçîka ra rojnamegere Ferda Çetîn vat: ''Kurdî paştdayîşo ke heq kenê û layîqê ci yê nêgênê.'' Çetîne bale ante ser ke DAÎŞ xo tay welatan de ke têkilîya yewîya Ewropa bi nînan esta newe ra rêxistin keno û vat: ''Na rastîye vejîyaye werte.''