Wexto ke 2011î de Wan de erdlerz virazîya, a zî uca de bîye. Havîna ke a bi xo mexdûra erdlerzî ya, ewro Semsûr de ya û hetkarîya mexdûranê erdlerzî kena. Havîne ard ziwan ke, a xerîbê na felakete nîya.

Kîye derheqê erdlerzê Wanî de wina vat, ‘‘Wexto ke erd lerzîya ez keye de bîya. Heta ez keye ra vejîyaya mi nêzana ke erdlerz o yan ney. Wexto ke ez vejîyaya teber mi fam kerd ke o erdlerz o. Ê hîssî ke nika mexdûrê erdlerzî hîs kenê, ê wextî de mi zî hîs kerdî. A roje ra heta çîyo ke nêbedilyayo no yo; kes hetkarîya mexdûranê erdlerzî nêkeno. Goreyê mexdûranê nikayinî halê ma başêr bî. Ewro ez ewnîyena ke kesêk çin o tîya de, tena zerrîwazî est ê.’’

Havîne ard ziwan ke hûmarê fermî yê erdlerzî rast nîyî û vat, ‘‘Teqez ez hûmaranê fermîyan ra bawer nêkena. Coka ma vînenê ke hûmara rastêne yê felakete yena nimitene. Ez ewro ameya tîya ke mexdûran rê hetkarî bikera, coka ez tîya der a. Heta ke destê mi ra bêro, ez do bikera. Sey erdlerzê Wanî, ewro zî kêmanîya dewlete est a. Awanîyêke nêmenda ke xesar nêgirewta. Heme sucê ci zî do tena dekerê vîyeyê mutahîdan’’