Bi fermanê Wezîrê Karanê Zereyî Horst Seehoferî  Weşanxaneyê Mezopotamya û Mîr Muzîk 12’ê Sibate 2019 de ameybî qedexekerdene. Polîsan eynî roje eştîbî serê her di sazgehan û berê sazgehan mor kerdîbî. Serra parî polîsan di reyî eştîbî serê nê di sazgehan û kitabê musnayîşê Kurdkî, kitabê domanan ê bi Kurdkî û kitabê tarîxî zî tede dest naybî serê xeylî kitaban.

Partîyê muxalefetî, weşanxane û xeylî sazgehê kulturî vera qedexekerdikşê Weşanxaneyê Mezopotamya û Mîr Muzîkî reaksîyon dabi. Partîya Çepe zî qedexekerdişê nê her di sazgehan berdîbî rojdemê Meclîsê Federalî. Hukmatê federalî cewabêko skandal û sosret da persnameya ke Vervatoxê Kulturî yê Partîya Çepe parlementera federalî Sîmone Barrîentose. Cewabo 6 rîpel o ke destê ANF’yî de yo, xeylî persî nêameyê cewabkerdene. Rixmo ke xebatê kitab û muzîk ê bi Kurdkî werte de yê, ame vatene ke PKK’yî seba bikarardişî kultur û muzîkê Kurdkî nê di sazgehî awan kerdê. Hukmatî da zanayene ke wextê qedexekerdişê her di sazgehan de zanayîşî nêdayê dewleta Tirkî labelê Serekkomarê Tirkî Recep Tayyîp Erdoganî nê serranê peyênan de xeylî sazgehê Kurdan kerdîbî hedef û înan ra vatibi gelo şima çira nê sazgehan qedexe nêkenê. Sereştişê Weşanxaneyê Mezopotamya û Mîr Muzîkî de polîsan dest naybî serê zanayîşanê şexsî yê muşterîyanê sazgehan zî û bi nê destsernayîşî cehd kenê ke vera Kurdan sîyasetê krîmînalîzeyî biramê.

Parlamentera Partîya Çep Sîmone Barrîentose reaksîyonêko wişk mojna qedexekerdişê sazgehan. Barrîentose cewabê hukmatî ANF’yî rê ercna û ard ziwan ke kultur û muzîkê Kurdî rîyê nufusê Kurdan ê ke Almanya de ciwîyenê parçeyê Almanya yo. Parlamentera Almanya  Sîmone Barrîentose vengdayîş bi Hukmatê Federalî kerd ke wa qerarê qedexekerdişê nê sazgehan betal bikero. Barrîentose waşt ke ganî arşîvê muzîkî bêro dayene û bikewo binê xizmetê merdiman.