Mîtîngê DEM Partîya ya Wanî de bi des hezaran kesê ameyî têhêt. Bi hezaran kesî zî neêşkayê bikewê warê mîtîngî. Warê Mîtîngî bi sologana “Bijî Serok Apo” zima. Badê rêzgirewtişê semedê şehîdan Hemsereka DEM Partî ya Bajarî Gulşene Kurt qisey kerd û bale ante grevê vêşanîye yê zîndanan û tecrîdê serê Rayberê Şarê Kurdî Abdullah Ocalanî ser. Hemserekê DEM Partî yê Bajarî Veysî Dîlekçîyî zî vat ê do roja weçînayîşî qeyûman bişawê.

Dima namzedê Bajarê Pîlî yê Wanî Neslîhane Şedal û Abdullah Zeydan û namzedê qezayan vejîyayî sehneyî ser. Nazedan zî qiseykerdişê xo de vat ê do qeyûman bişawê.

Hemserekê Pêroyî yê DEM Partî Tuncer Bakirhanî seba ke zaf şar ameyo pêser keyfweşîya xo ard ziwan û vat: ''Hesabê îqtîdarî yo xelet do Wanî ra agêro. Şarê kurdî do hesabanê înan ê xelatan bixeripnê. Şarê Wanî vera heme zextan tim xover da û ewro ra tepîya zî do xover bido. Îqtîdar ganî polîtîkaya qirkerdişî ya vera kurdan caverdo. Kurdî tim semedê haştîye destê xo derg kenê.  Şar nêeşkeno îdareyê xo bikero, pereyo ke şima şerî rê xerc kenê semedê şarî xerc bikerê. Tirkîya semedê polîtîkaya  dişmenîya vera kurdan tim peynî de menana.

Şarê Wanî ewro reyna semedê haştîye qîreno, reyna çareserkerdişê meseleya kurdan wazeno. Qeyûm dizdîye ya,dişmenîya vera ziwan û kulturê kurdan o. Dişmenîya vera ciwanan û cinîyan a.  Erdoganî vato 'kurdan xeyrê ma şayî û azadîye dîya' Qay hûmayî destê xo bidê serê wîjdanê xo 22 serrî yo ma têna şewêke rehat kewtî ra? Têna rojêke ma bîyî azad? Ma kerdişê ci xo vîra nêkerdî. Ne Dayîka Taybete ne Hatîce Yildiza 25 serrî ya ke zîndan de ne zî kerdişê ci yê bînî ma xo vîra nêkerdê.

Şarê kurdî û şarê tirkî do 31ê adare de kartê sûrî bimojê nê sîstemê zalîmî û fehmê faşîstî. Partîya ke meseleya kurdan çareser mekero nêeşkena payra bimano. Şarê kurdî meydananê Newroze ra bi mîlyonan bi yew zerrîye û vengî vaşt wa meseleya kurdan bêra çareserkerdene û vat muxatab Birêz Ocalan o. Ma zî vanê ke no waştişê şarê kurdî heqdar û waştişê ma yo zî.''