Kongreya Komelê Demokratîkî (KCD), Partîya Herêman ê Demokratîkan (DBP), Têgêrayîşê Cinîyan ê Azadan (TJA) û  Meclîsê Ciwanan ê Partîya Demokratîke ya Şaran (HDP) derheqê Newroze de kombîyayîşê çapemenîye yo hempar organîze kerd.

Kombîyayîşo ke Merkezê Pêroyî yê DBPyî ame kerdene Hemserekê KCDyî Berdan Ozturk, Hemserekê Pêroyî yê DBPyî Salîha Aydenîz û Keskîn Bayindir, bi nameyê TJA Wekîla HDPyî ya Amedî Semra Guzel û bi nameyê Meclîsê Ciwanan ê HDPyî Çeko Mîmkara tewrê ci bîyî.

Şarê kurdî cewabê xo da

Hemserekê KCDyî Berdan Ozturkî vat: ''Şarê kurdî binê hêrişanê îqtîdarê AKP-MHPyî de na Newroze kerde. Îqtîdaro ke vera kurdan polîtîkaya hêrişkare rayra beno vatêne 'hînî çend tenî nînê têhet, ma kurdî qedînayî, ê do wayîrê nasnameyê xo mevejîyê.' La şarê ma Îstanbulî ra heta Amedî mesajê 'ma vera polîtîkaya şima ya leyminê tîya de yê' da. Şarê kurdî reyna meydanna de azadîye haştîye waşte. Kurdan meydananê  Newroze de vat 'Rayberê ma Ocalan o, adresê haştîya Tirkîya Ocalan o' û  Îmrali nîşan da. Waştişê şarê kurdî semedê ma talîmatê.  Ma tîya ra şarê xo rê spas kenê.''

Mîlyonan vera tecrîdî vengê xo berz kerd

Hemsereka Pêroyî yê DBPyî Salîha Aydenîz zî vat: ''Şarî meydananê Newroze ra mesajo zelal da îqtîdarî. Senî ke Newroze 1992yî yê Cizîre û Nisebîn dewrê muhîmî bî Newroza 2013yî zî tarîxî bî. Ganî Newroza 2021yî zî sey yew hoka mûhîme bîgêrîyo dest. Meydanan de tewr zaf mesajê  tecrîdê serê Ocalanî û azadîye bibî. Rojdemo verên ê mîlyonan wedaritişê tecrîdî bi. Şarî ard ziwan ke xoverdayîş û mucadele azadîye danê qezenckerdene.  Reyna  mesajê yewbîyayîşê şarê kurdî estbî û vera dewaya qefilnayîşê HDPyî zî şar wayîrê partîya xo vejîya.''

Cinîyî vera qirkerdiş û tecrîdî meydanan de bî

Wekîla HDPyî ya Amedî Semra Guzela ke bi nameyê TJA qisey kerd vat: Serranê peyênan de dezgehê cinîyan, modelê hemserekîye û Pêkerdişê Îstanbulî zafêr hedefê îqtîdarî de yo. Îqtîdar zano ke o do pê mucadeleyê cinîyan şiro. Coka hêrişê xo zafêr kerdî. Tecrîd verî serê cinîyan de yeno rayraberdene.  Cinîyan Newroze de vera tecrîdî waştişê azadîye arde ziwan.  Cinîyan paştî daye vengê xoverdayîşê zîndanan û mesajê pîlkerdişê mucadeleyî dayî.

Ma pê ruhê Newroze mucadeleyî pîlêr bikerê

Çeko Mîmkarayo ke bi nameyê Meclîsê Ciwanan ê HDPyî qisey kerd nê vatî: ''Ganî mesajê Newroze raşt bêrê wendene û netîceyê ci bêrê vetene. Ciwanan vera tecrîdê Îmraliyî û polîtîkayanê leyminan ê vera şarî tewiro hîsgêr ramojna. Newroza emserî semedê prosesê verê ma perpsektîfêk ard ra. Çîyo muhîm oyo ke no perspektîf raşt bêro wendene û bêro caardene. Ma pê ruhê Newroze mucadeleyî pîl bikerê.''