Amed de vizêr  serkêşîya Platformê Dezgehanê Demokratîkan de bi şîarê ''Ma vera komployî xover danê, semedê azadîye Amed de yenê têhet''  semedê azadîya fîzîkîye ya Rayberê Şarê Kurdî Abdullah Ocalanî Mîtîngê Azadîye ame organîzekerdene.Semedê mîtîngî sere de Wan, Riha, Mêrdîn, Îstanbul, Adana, Mersin heme bajaranê Kurdîstanî ra şarî verê xo da Amedî. Vera astengkerdişan rayîr de şarî xover da û ca ca çalakîyê roniştişî ameyî kerdene.

Verê mîtîngî heme kuçeyê Amedî gerîyayî binê ablûqa û heme rayîrê ke şine Meydanê Îstasyonî ameyî qefilnayene. Bi sebebê qedexeyê walîtîye ame waştene ke verê mîtîngî bêro girewtene. Şar vera qedexeyî hîrê cayan de, verê  Liseyê Birlikî yê Rezanî, Halê Kahanî yê Sûrî û AZC Plaza yê Yenîşehîrî  de ame têhet. Rixmê ablûqaya polîsan bi hezaran kesî hîrê cayan de ameyî têhet  û slogananê “Biji Berxwedana Zindana”, “Ma do bi têkoşînî ser bikewê”vatî. Verê AZC Plaza de Hemsereka Pêroyî ya  DBPyî Çîgdeme Kiliçgun Uçar  û Hemserekê Pêroyî yê DEM Partî Tuncer Bakirhan, avûkatê Buroyê Huqûqî yê Asrinî, wekîlî, rêxistinê komelê sîvîlî, Dayîkê Haştîye û bi hezaran kesî ameyî têhet.

Nuqtayanê cîya cîyayan ê bajarî ra ver bi AZC Plaza rayraşîyayîşî ameyî kerdene. Vera heme qedexe, astengkerdiş û huqûqê dişmenîye bajar de têkoşîn bi sey mewzîyêke. Her kuçeyê Amedî de têkoşîno biheybet ame rayraberdene. Têkoşîn û hîsê heme sloganan de azadîya Rayberê Şarê Kurdî Abdullah Ocalanî ameye waştene. Şarê kurdî Amed de wayîrê îradeyê xo û Rayberîya xo vejîya û semedê şiknayîşê tecrîdî ruhê têkoşînî her warî de mojna ra. Bitaybetî slogana ciwana a ''Ma do zere de û teber de tecrîdî bişiknê'' cewab de heme qedexeyan.

Hîkayêka heqîqetî ya nê rêkoşînî est a. No heqîqet oyo ke no şar semedê Rayberîya xo her warî açarneno warê têkoşînî. Şarê kurdî reyna bi slogana ''Ciwanî fedayîyê Apoyî yê'' wayîrê Rayberîya xo û têkoşînê xo vejîya. Dayîkanê Haştîye yê ke têna haştîye wazenê vera hêrişanê polîsan bi tîlîlî û sloganan ruhê têkoşînî mojna ra. Mîtîng ame qedexekerdene la îrade û têkoşînê şarî nêame qedexekerdene. Şarê kurdî her war açarna warê têkoşînî.

Verê AZC Plaza de pankartê ''Cinîyî rayra şinê tecrîdî şiknenê'' ye cinîyan ame waştene ke bêro destsernayene. Cinîyan seba ke pankartê xo nêda derheqê înan de zabitname ame nuştene. Cinîyan ke vera nê nêrazîbîyayîş mojna bi slogana ''Ma do bi têkoşînî ser bikewê'' cewab da. Şarê bi slogana ''Ma do zere de û teber de tecrîdî bişiknê'' û çapikan ablûqaya polîsan şermezar kerd.

Bado ke hemserekî û birayê Rayberê Şarê Kurdî Abdullah Ocalanî, Mehmet Ocalan kewtî warî şarî sloganê sey , “ Bijî Serok Apo”, “ Jin Jiyan Azadî” vatî. Rixmê heme anonsanê polîsan şarî bi slogana ''Zextî nêeşkenê ma vindarnî'' qîrayîşî rê dewam kerd.

Bi saetan cuwa pê şarê ke  nuqtayanê cîya cîyayan ê bajarî  ra xo resna verê AZC Plaza sloganê sey “Gerilla dimeşe erd û ezman diheje”, “Selam selam İmralı’ya bin selam”, “Bijî Serok Apo”  vatî.  Bi anonsan şar bi destbendkerdişî ame tehdîtkerdene. Şarî bi vatişê xora ma ra bi hezaran kesî nêzaret û hepisxane de yê, şima kamî tersnenê? Nêrazîbîyayîş mojna ra. Fotografê Abdullah Ocalanî yo ke rojname de bi ame berzkerdene û şarî bi çapikdan paştî daye fotografî.

Badê têkoşînê bi saetan  bi sloganan eşkerayîya çapemenîye ameye dayene. Hemsereka Pêroyî ya DBPyî Çîgdeme Kiliçgun Uçar vat: ''Meseleya kurdan yena înkarkerdene. Meseleya kurdan meseleya asayîşî nîya. Meseleya kurdan meseleya azadîyan û statuyî ya. Muxatabê çareserkerdişê meseleya kurdan Birêz Ocalan o. Fikr û projeyanê Birêz Ocalanî ra metersê.''

Hemserekê Pêroyî yê DEM Partî Tuncer Bakirhanî zî vat: ''Tabloyo ke ewro ma tîya vînenê eslê xo de êyê ke vanê 'Ma do haştîye bîyarê Tirkîya' ê serûbin kerdî.''

Têkoşînê şarê kurdî yê Amedî reyna mojna ra ke tecrîd û komployê mîyanneteweyîyî ameyî betalkerdene.