Tepişteyanê dewaya PKK û PAJKî 4ê nîsane de grevê vêşanîye kiriştbi safhaya diyîne û ê na çarçewe de mehkemeyan boykot kenê, nêşinê pêvînayîşan.

Îdarekara Komeleya Huqûqnasan a Seba Azadîye (OHD) ya Îstanbulî Necla Mizgîne Argiş derheqê babete de ANFyî rê qisey kerd.

Necla pare kerd ke tecrîdê Îmraliyî vilayê pêro komelî bîyo û vat: ''Wextêkê dergî ra nata Birêz Ocalanî ra xeberêke nêna girewtene. Tepişteyî vera tecrîdî grevê vêşanîye de yê. Tepişteyanê sîyasîyan na çalakîye sey tewirêkê nêrazîbîyayîşî nêdaye destpêkerdene, ê na çalakîye sey parçeyêkê têkoşînê xoresnayîşê raştîye vînenê. Coka têkoşînê vera tecrîdî awankerdişê cuyêka azade û newîye de wayîrê cayêkê girîngî yo.''

Necla vist vîrî ke Wezîrîya Edaletî derheqê babete de gamêka aktîfe nêeşta û vat: ''Seba qedînayîşê binpaykerdişê heqanê merdiman ê zîndana û wedarnayîşê tecrîdî ganî wezîrîye game bierza. Têkoşînê vera tecrîdî ganî sey babeta huqûqî, sîyasî, sosyal û polîtîke bêra ercnayene. Girîng o ke Wezîrîya Edaletî çareserîyanê bitesîran peyda bikera.''