Fermandar û karoyanê rayberan ê PKKyî ra Abdulrahman Hamo (Dozdar Hamo) teşrîna peyêne ya 2019î de hêrişêkê hewayî yê dewleta tirke de şehîd bi.

Partîya Marksîst-Lenînîste ya Almanya (MLPD) derheqê şehadetê Hamoyî de eşkerayîyêke daye. Eşkerayîye wina ya: ''Ma zaf kewtî şehadetê embaz Hamoyî ver. Heyetê Koordînasyonê Enternasyonalî yê Rêxistin û Partîyanê Şorişgêran (ICOR)o ke tede endamê MLPDyî zî estê, çend reyî Dozdar Hamoyî reyde pêvînayîşî kerdbi. Coka mabênê ma de têkilîyêka xurte estbî.''

Eşkerayîye de ercnayîşê îdarekarê MLPDyî Gabi Fechtnerî yê derheqê Dozdar Hamoyî de ame vîrvistene. Fechtnerî vist vîrî ke Hamo pê bawer bi ke têkoşînê azadîye yê kurdan do bi paştdayîşê enternasyonalîstî ser bikewo. Eşkerayîye wina dewam kena: ''Hamoyî pare kerdêne ke xoîdarekerdişo demokratîk  parçeyêkê şorişê sosyalîstî yo. Şehadetê Hamoyî seba şorişgêran vînbîyayîşêko pîl o. Ma do sîstemê kolonyalîzmî çin bikerê û perwerîya xo ya seba têkoşînê ci bimojnê. Sereyê keye, embaz, şarê kurdî û şorişgêran wa weş bo.''