Endama Komîteya Merkezî û Sekretera Kongreya 15ine ya Partîya Komunîste ya Afrîkaya Başûrî (SACP) Mollye Dhlamini beşdara Festîvala Kulturê Kurdan a Frankfurtî bibî û tîya de ajansê ma rê qisey kerd.

Mollye dîyar kerd ke ê paştî danê dewaya azadîye ya kurdan û vat: ''Şarê Afrîkaya Başûrî û şarê kurdî seba çarenusê xo têkoşîn kenê. Ma paştî danê şarê kurdî ke seba azadîya Ocalanî, kultur û ziwanê xo têkoşîn keno.''

Mollye bale ante tecrîdê vera Rayberê Şarê Kurdî Abdullah Ocalanî ser û vat: ''Abdullah Ocalan 25 serran ra nata zîndan de yo. Mandela zî hende zîndan de tepişîyabi la binê tecrîdê winayênî de nêbi. Tecrîdê Îmraliyî binpaykerdişê heqanê merdiman o. Ma wazenê ke Ocalan azad bibo û meseleya kurdan bêra çareserkerdene.''

Mollye ard ziwan ke şarê înan û şarê kurdî seba azadîye, ziwan û kulturê xo têkoşîn kenê û vat: ''Ma seba paştdayîşî na festîvale de yê. Ma venga pêro haştîgîran û pawitoxanê heqanê merdiman zî danê ke wa paştî bidê têkoşînê şarê kurdî.''

Mollye vist vîrî ke menga êlule Afrîkaya Başûrî de menga mîrasî ya û ê girîngîya mîras, kultur, ziwanî fam kenê. Mollye vat: ''Ma 30 serrî yo azadîye û demokrasîyî fîraz kenê. Ma şayîyanê êlule de teda û zorbazîya vera ziwan û kulturê xo anê vîrê xo. Ma vera qedexeyan zaf têkoşîn kerdbi.Ganî merdimî ziwanê xo bipawê. Wa şarê kurdî qetî hêvîya xo vinî nêkero, seba heqanê xo têkoşîn bikerê û waştişê seba azadîya Ocalanî xurtêr bikero.''