Roniştişê Heqanê Merdiman a 57ine yê Konseya Heqanê Merdiman a Neteweyanê Yewbîyayeyan (NY) do heta 9ê teşrîna verêne Cenevre de dewam bikerê. Têgêrayîşê Dostanîya Mabênê Şaran ê Vera Nîjadperestîye (MRAP) zî deklarasyonêko nuştekî pêşkêşê roniştişan kerd. Deklarasyon de bale ameye antene kerdişê bêhuqûqan ê dewleta tirke ya îşxalkere yê vera kurdan û tecrîdê Îmraliyî.

Deklarasyon de ame îfadekerdene ke dewleta tirke huqûqî binpay kena, vera kurdan her warî de teda kena. Deklarasyon de hêrişê peyênî yê vera kultur û ziwanî ameyî vîrvistene û wina ame vatene: ''Sere de kinc, folklor û muzîkê kurdan vera sembolanê kulturê kurdan nîjadperestîye yena kerdene û nê benê sebebê tepiştişî.''

Deklarasyon de ame vatene ke zîndanê Tirkîya seke îşkencexane yê û pêro heqê Rayberê Şarê Kurdî Abdullah Ocalanî yenê binpaykerdene. Deklarasyon de wina ame vatene: ''Bi cezayanê dîsîplînî û tecrîdî tepişteyanê sîyasîyan rê îşkenceyêko giran yeno kerdene. Seba ke kurdkî qisey kenê, payan ser de nêvindenê, grevê vêşanîye kenê cezaya dîsîplînî dîyenê nê tepişteyan û tepişteyê sîyasîyî yenê tecrîdkerdene.''

Deklarasyon de ame parekerdene ke Zîndanê Îmraliyî bîyo merkezê bêhuqûqîyan û wina ame vatene: ''Abdullah Ocalan1999 ra nata tecrîdkerde yo û pêvînayîşê ey ê bi keye û avûkatan yenê astengkerdene. 25ê adara 2021î ra nata destûr nêdîyeno ke Ocalan de têkilîye bêra ronayene. ''

Deklarasyon de ame vîrvistene ke zîndananê Tirkîya de 1417 tepişteyê nêweşî est ê.

Deklarasyonî roniştişê peyênî yê Komîteya Vergirewtişê Îşkenceyî (CPT) ya NYyî vistî vîrî û vat ke rixmê pêşnîyazanê Komîte zî tepişteyê Îmraliyî nêeşkenê keye û avûkatanê xo bivînê.

Deklarasyon de wina ame vatene: ''Tirkîya rixmo ke peymanê heqanê merdiman îmza kerdî, biranê Mehkemeya Heqanê Merdiman a Ewropa, CPTyî û mekanîzmayanê NYyî nêana ca. Wa Tirkîya cade nê pêşnîyaz û biran bîyara ca. Ganî Konseya Heqanê Merdiman a Ewropa vera sûcanê serê kurdan bi mesuldarî têbigêra. Ganî CPT cade şoro, Zîndanê Îmraliyî zîyaret bikero.''