Parlamentera HDPyî ya Dîlokî Muazzeze Orhan derheqê erdlerzî de ANFyî rê qisey kerd.

Muazzeze Orhan ard ziwan ke ê roja yewine ya erdlerzî de şîyî Dîlok û vat ke qesê 3 rojan tîmê xelisnayîşî nêameyî herêma erdlerzî. Muazzeze Orhane wina vat, ‘‘Şar hewl dayêne ke bi îmkananê xo merdimanê xo binê xirban ra bivejê. Xeylê kesî wexto ke paweyê hetkarîya xelisnayîşî bîyî, binê xirban de merdî.’’

 ‘Ma nêzanê ke gedeyî berdî kamca’

Orhane dîyar kerd ke gedeyê ke may û pîyê înan erdlerzî de merdî, berdî nêweşxane û dima berdî cayanê cîya-cîyayan û wina dewam kerd: ‘‘Ma nêzanê ke ê gedeyî berdî kamca. Vanê ê gedeyî binê konrtolê dewlete de yê. La ma zanê ke erdlerzê verênan de xeylê gedeyî vindî bîyî.’’

Xebatan de bi cîhazanê teknîkî nêxebitîyayî

Orhane vat: ‘‘Însanî bi rojan vêşan, têşan û serdan ver de mendê. Roja 5ine ya erdlerzî de xebatî ameyî destpêkerdene. Xebatan de qet bi cîhazanê teknîkî nêxebitîyayî. 

‘Dewlete felakete awan kerde’

Muazzeze Orhan qiseykerdişê xo wina qedêna, ‘‘Merdimî qasê 3 rojan bê werd û bê awe bîyî. Erdlerz afetêko xoza yo la ma dî ke dewlete no afet kerd felaketêka girde. Şarê heme Tîrkîya bîyî seferber û waşt ke hetkarîya şarê xo bikero la dewlete reyna vernîya her çîyanê başan de bîye asteng.’’