23yê kanûne de paytextê Fransa Parisî de 3 aktîvîstê kurdî ameybî qirkerdene û naye ra pey roja şemeyî seba protestokerdişê qirkerdişî rayraşîyayîşêko pîl amebi kerdene. 

Wextê çalakîye de kesêko ke paramîlîtero nîjadperest ê dewleta tirke yo, provakasyon vet û naye ser  alozîye vejîyaye.

Mudirê Asayîşê Parisî Laurent Nunezî BFM TVyî rê qisey kerd û vat: ''Çalakîyî bi beşdarîya kesayetanê sîyasîyan bi hawayêkê normalî dewam kerd.''

Nunezî ard ziwan ke saete 13.00 ra dima provakasyonî ra dima serebûtî qewimîyayê û vat: ''Yeno parekerdene ke kamyonêke derbaz bîya û bi nê hawayî agahîye mi rê ameye. Ma do nê çîyan zelal bikerê. Tay çalakîkerî bulvarêkê bînî de polîsan de pêkewtî. Bêguman no zî provakasyonêk bi.''

Nunezî pare kerd ke 11 kesî ameyê destbendkerdene û organîzatoranê çalakîye kerd ke verê provakasyonan bigêrê.

Nunezî îfade kerd ke serebûtan de 31 polîsî bi şenikî birîndar bîyê û ard ziwan ke wexto ke înan eşkerayîye dayêne çalakîkerêk birîndar bîyo û camê tay kargehan ameyê xêzkerdene.