Wezîra Xizmetanê Komel û Keyeyî yê Tirkî Derya Yanik Adana de gama ke esnafî zîyaret kerdêne persê derheqê multîyanê sûrîyeyîjan wina cewab kerd. ''Mesele têna pawitişê ganê sûrîyeyijan nîyo, wetê sînîro ma pawitiş o. Tirkîya têna merhametê xo ra tîya nêewnîyena 5 mîlyon sûrîyeyîjan ra. Ganî no hol bêro famkerdene. Ma nêverdenê wa nizdîyê sînorê ma de dewletêka kurdî bêro ronayene.'' Hemvervatoxê Komîsyonê Multecî û Macîran ê HDPyî Murat Çepnîyî polîtîkaya îqtîdarî ya bextwaştişan  ANFyî rê ercna.

Murat Çepnî vat: ''Tirkîya de meseleya macîran bitaybetî zî meseleya merdimanê ke Sûrîye ra ameyî Tirkîya zaf vera îqtîdarî sey karê vîjnayîşî şuxulyena. Ma xo ra nê raşt nêvînenê. AKP meseleya macîran ser firsetêkî şuxulneno. Polîtîkaya ke APK reyra bena polîtîkaya dewlete ya. Na polîtîka Rojawan de vera statuyê kurdan a. Derdê înan macîrê sûrîyeyîjê nîyê, derdê înan o yo ke kurdî bê statu bimanê.

Statuyo demokratîko ke şarê kurdî Rojawan de fînayo dest wazenê werte ra wedarê. AKP nê hem sey firsetê vîjnayîşî şuxulneno hem zî warê mîyanneteweyîyî de şuxulneno. Senî ke qiseykerdişê wezîre Yanike ra zî yeno famkerdene ê statuyê Rojawanî sey rîsk vînenê û semedê çînkerdişê ci destê înan ra çi yeno kenê. Yanike polîtîkaya înan zî eşkera kerde.

Îqtîdar tim propaganda keno ke sere de Efrîn herême de banî viraştî. Nê banî semedê piştişê derbanê şarî nêameyî viraştene. Tîya macîran ca kenê ke demografîyê herême bibedilnê. Nê planê demê dergî yê. Xeylêk merdimê merkezanê peydşawitişî ra  bi hewayêkê bêhuqûqî yenê şawitene. Ma hûmera raşte nêzanê. Kesê ke şerî ra remayê şawenê merkezê şerî. Bi qala bîne şawenê mergî. Seba ke şer û polîtîkaya îşxale est ê şar welatê xo ra remeno û raştê zulm û zextî yeno. Sebebê nê sere de Tirkîya, Amerîka, Rûsya û hêzê serdestî yê herême yê.''