Endamê Komîteya Rayberdişî ya PKKyî Murat Karayilanî programêkê taybetî yê Stêrk TVyî de averşîyayîşê badê ''Vengdayîşê Haştîye û Komelê Demokratîkî'' yê Rayber Apoyî erjnayî.

Murat Karayilanî vistvîrî ke Newroza emserî prosesê tarîxîyî de yena kerdene û nê vatî: ''Şarê ma na Newroze bi şîarê 'Rayberîye rê Azadîye Komelê Demokratîkî' pîroz keno. Newroza 2025î semedê azadîya Rayber Apoyî û çareserîya meseleya kurdan eşkena biba destpêkerdişêko newe. Xora azadîya Rayberîye eynî wextî de yena manaya azadîya şarê kurdî û çareserîya meseleya kurdan. Eynî wextî de haştîya şaranê kurdan û tirkan. Seba ke Newroza 2025î azadîya Rayberîye û şarê kurdî bîyaro ca, gerek ma  zî bi heme hêzê xo cehd bikerê.

Gerek warê Newroze bêrê pirrkerdene û vendayîşê semedê azadîya Rayber Apoyî û şarê kurdî bêrê kerdene. Gerek Newroze de têna slogana  ‘Bijî Serok Apo’ û sloganê azadîya Rayberîye bêrê vatene. Kam ke demokrasî û azadîye wazeno gerek dormeyê waştişê şarê kurdî bêro têhet. Nê hetî ra Newroza Amedî zaf muhîm a. Gerek emser serra 2013yî ra zafêr tewrbîyayîşê Newroze bibo. Şarê ma yê Riha, Êlih, Çewlîg û Mêrdînî gerek tewrê Newroza Amedî bibo. Gerek şarê ma proses de giranîya xo ramojno. Heme dinya wa na şayîya azadîye û demokrasîyî seyr bikero.''

Murat Karayilanî derheqê vengdayîşê Rayber Apoyî de nê vatî: ''Kesê ke ma kenê ke înan de haştîye bikerê, yanî dewlete gerek ma raşt fam bikero. Çîyo ke Rayber Apoyî bi vengdayîşê tarîxî fîna meydan çîyêko gird o.51 serrî yo no têkoşîn û 41 serrî yo no şer yeno rayraberdene. Kadroyê qerardarî yê ke vindertişê ci yo îdeolojîk est o nê têgêrayîş de ca genê. Komkerdişê kongre, feskerdişê partî û çekeronayîş rewşa muhîm a. Coka têna Rayber Apo yo ke ronayoxê na partî yo û heme embazî ey esas genê, eşkeno prosesî rayra bero û netîce bigîro. Rayberîya ma bi tewirêkê aktîf bi rêxistinkerdişî eşkeno prosesî ser bifîno. Seba ke qet grûbêke teber de memano, her kes îkna bibo gerek wina bibo.''

Tayî nê sey şertî hesibnenê û vanê 'ma şert qebul nêkenê' la semedê rayraberdişê prosesî na hewcedarî ya. Gerek şertê ci bêrê caardene ke Rayber Apo nê prosesî de aktîf ca bigîro. Yanî gerek azad têbigêro. Teberê welatî ya zî zîndan ra tay embazê ma eşkerayîyanê xo de vanê Rayberîye wa mesaj bişawo. La no gure bi mesajêk nêbeno. Mesela eke kongre bibo gerek Rayber Apo heme merhaleyanê ci bizano, hayîya ci heme qeraran ra bo û cewab bido. Beno ke nêeşkeno bêro warê kongre û teberî ra tewrê ci beno; wina bi rayîrê teknîkî beno ke hal bibo la gerek heyet şiro cayê ci bêro. Gerek perspektîf bişawo kesê ke îkna nêbenê înan de qisey bikero. Wa her kes bizano ke embaz, şervan û fermandarê ma ke îkna nêbîyî est ê. Tay kesî teberî ra erjnenê la ma tîya de yê û dahîna hol zanê. Na xusus de tay babetî embazê ke tîya de yê înan rê bimanê, dahîna hol beno. Pêro vanê wa bibo, bêro caardene la gerek semedê nê şertî bêrê afirnayene.''

Murat Karayilanî vengdayîşê Devlet Bahçeliyî vist vîrî û wina dewam kerd: ''Vengdayîş ame kerdene, ma zî sey PKKyî cewab da adirbirnayîş îlan kerd. Înan verê keyfweşîya xo ard ziwan vat na game vengdayîşê Rayberîye temam kerd. Dima ra tayînan tewirê xo bedilna. Gerek gamê qanûnî bêrê eştene û verê Rayberîya ma bêro akerdene. Herinda gameeştişê de tarîxê kongre persenê. War de şer est o. Îmkanê kongre çîn ê! Eke hetê dewlete raşta wazeno proses ser bikewo gerek her kes wezîfeyo ke kewno milê ci gerek bîyaro ca. Embazê ma heta ke vengê Rayberîye meeşnawê û mevînê verê azadîya ci abîya îkna nêbenê. Hetê aqilselîmî yê mîyanê dewlete gerek çîyê ke hewce kenê bîyarî ca. Proses têna wina eşkeno aver şiro.

Tayî qala hasasîyetî kenê; pekî hasîsîyetê kurdan çîn ê? Şîdetî sey terorî hesibnenê. Eke çîyo ke ma kerd tira vanê 'teror' dewlete ma zafêr teror kerd. Bi qala kilme şerêk qewimîya û ma nika haştîye wazenê.  Gerek herinda ziwanê dişmenîye de ziwanê haştîye bêro şuxulnayene. La ziwan û zîhnîyet înan  sey verî yê. Ziwanê înan ra adir pereno.Tam dişmenîye kenê. Eşkera yo ke tay hetî wazenê prosesî sabote bikerê. Hetê kurdan de zî est ê.  Dahîna muhîmê ci zî Rojhelatê Mîyanênî de hetê ke wazenê no şer dewam bikero, est ê. Çunke şerî ra rant fînenê dest.

Ma bêalternatîf nîyê. Îmkanê ma est ê. Ma çîyêk rê mecbûr nîyê. Ma herême de hêzo pîl ê. Ma eşkenê tekîlîyan biafirnê la ma bi hêzê xo eşkenê vera her qeyde hêrişan xo bipawê. Ma pabesteyê Rayber Apoyî yê û semedê projeyê ci hazir ê. Nika semedê nê cehd kenê. Na nuqta de gerek Rayber Apo pratîk de paştî bido ma û dewlete zî na babete de rayîr abikero.  Eke haştîye bena gerek tay çîyan qebul bikerê, wina çekî werte ra bêrê wedaritene. Bi qala kilmê ma hem çarçewaya vengdayîşê Rayber Apoyî de semedê haştîye û çareserî hazir ê, hem zî eke dewlete nê qebul mekero û bêro ma ser, ma semedê şerî zî hazir ê. Wa her kes nê bizano.''