Meclîsê Federalî yê Almanya de bi serrnameyê 'Hêrişê vera heqanê merdiman ê Tirkîya, Almanya û Ewropa de netîceyê ci' wekîlan wedaritişê Peymana Îstanbulî û dewaya qefilnayîşê HDPyî ser o qisey kerd û pare kerd.

Hêverî Partîya Keskan ra Cladia Roth qisey kerd. Cladia bêvengîya Ewropa ya vera îqtîdarê AKP-MHPyî şermezar kerde û vat: ''Pê fermanê Erdoganî wedarnayîşê Peymana Îstanbulî cinîyan û Tirkîya rê lapatêk bî. Hînî tirkîya de teda kerdişêko rojane yo. Îqtîdarê HDP-AKPyî wazeno HDP krîmîzalîze bikero. Wa Tirkîya cade Osman Kavala, Selahattîn Demîrtaş, Fîgene Yuksekdag û ê bînî vera bidîyê.

Koma Xirîstîyanan ê Demokratan (CDU) ra Michael Brandî zî Erdogan rexne kerd û vat: ''Tirkîya endama NATOyî ya û ganî pêro krîteranê NATOyî bîyara ca. Ganî NATO Tirkîya ser o teda bikero.''

Partîya Demokratan a Çepe (SDP) ra Babreiele Heinrich ganî dewaya qefilnayîşê HDPyî ra semed Berlin û Bruksel Anqara hîşyar bikerê û eke Tirkîya biranê Mehkemeya Heqanê Merdiman a Ewropa (MHME) ca nîyara wa Konseya Ewropa ra bêra vetene. 

Partîya Demokrate ya Azade (FDP) ra Byde Jensenî da zanayene ke vateyê 'reformî' yê Erdoganî xapînayîş o û ganî Tirkîya bira seba Peymana Îstanbulî betal bikera. 

Partîya Çepe ra Sevîme Dagdelen qisey kerd û vat: ''Cara bi hezaran endam û îdarekarê HDPyî zîndan de yê, nika zî ê wazenê HDP biqefilnê. Senî ke ma vera faşîstanê almanan vejîyayî ganî ma vera faşîstanê tirkan zî vejîyê.''

Partîya Keskan ra Cem Ozdemîr zî hukmatê Merkele rexne kerd û vat: ''Ma gêrenê dostan, hemkaran nê. Wa hukmat paştî nêdo Tirkîya.'' Ozdemîrî eşkerayîya Wezîrê Karanê Zereyî yê seba qefilnayîşê HDPyî zî rexne kerde û vat: ''Seke sefîrê tirkî na eşkerayîya nuşta.''