Şaristanê Stuttgardî yê Almanya de Veysel S., Agît K., Evrîm A., Ozkan T. û Cîhan A.yî rê dewa ameybî akerdene. Îtîrafker Ridvan O.yî hîrê roniştişanê peyênan de şahîdîye kerde û cewab da persanê heyetê dadgehî.

Vejîya meydan ke îfadeyê îtîrafker Ridvan O.yî yê verî û nikayî yewbînan nêgênê. Îtîrafker Ridvan O.yî çalakîyê kulturî û têkilîyê bi sazîyanê elewîyan waşt ke sey “xebata organîzasyonî” dadgehî rê bido qebulkerdene. Awukatê Ozkan T.yî Von Der Bernhesî zî notê xo yê derheqê îfadeyanê îtîrafker Ridvan O.yî pêşkêşê heyetê dadgehî kerdî. Ridvan O.yî îfadeyê xo yê hetê polîsan de vatîbî ke Ozkan T. çirey nêdîyo la dadgehî de vat ke ‘verî ke bêro remnayene’ ey Ozkan T. dîyo. Roniştişê roja pancşemeyî de zî Ridvan O.yî ra ame waştene ke senî ameyo remnayene û resmanê cayê ke o îdîa keno ke uca ameyo remnayene nîşan bido. La vejîya warye ke Ridvan O. uca nas nêkeno û baş nêno ey vîrî. Heyetî roniştiş taloqê roja dişemeyî kerd.