Seba Şaredarîya Dêrsimî namzedê Îtîfaqê Dêrsimî Bîrsene Orhan û Cevdet Konak ê. Îtîfaqo ke tede DEM Partî zî est a, bi 22 madeyan beyannameyê xo yê weçînayîşî amade kerdbî. Weadê namzedanê Şaredarîya Dêrsimî yê Îtîfaqê Dêrsimî sey projeyan ameyî amadekerdene. 

Projeyê namzedan wina yê: 

Seba ke verê koçkerdişan bêro girewtene derheqê erdlerzî de perwerdeyî û amadekarîyî do bêrê kerdene, warê îstîhdamî bêrê awankerdene û Akademîya Teknolojîya Dîjîtale ya Dêrsimî do bêra awankerdene. 

Citkaran rê destekê bezre, ley û şêwirmendîyan do bêro dayene. Bankayê Xida û Kincan do bêrê ronayene. Goreyê astengdaran rayîrî do virazîyê. 

Keyeyê Cinîyan û Merkezê Paştdayîşê bi Cinîyan do ronîyê. Cinîyan rê ''JIN KART'' do bêro dayene. Seba ke cinîyî bi rehetî û beleşî biresê malzemeyanê weşîye ''HÎJYENMATÎK''î do bêrê ronayene.

Ciwanî do seba aktîvîteyanê kultur, huner û zanistî bêrê teşwîqkerdene. Merkezê Kulturî yê Ciwanan, sahayê sporî û warê kaykerdişî yê domanan do ronîyê. Merkezê Têkoşînê Vera Tîryakîbîyayîşî do bêro ronayene. 

Her taxe de kreşê bêpereyî ronîyê ke nînan de bi ziwanê dayîke perwerde do est bo. Seba ke kirmanckî (kirdkî) bêra pawitene Akademîya Ziwanan do bêra ronayene. 

Muzeya Vîrî ya Dêrsîmî û Merkezê Vîrî yê Elewîyan do bêrê ronayene. Cemxaneyê Gazikî do bêro akerdene.  

Awa Munzurî do musluxanê pêro keyeyan ra biherikîya û bi nê hawayî meseleya awe zî do bêra çareserkerdene.

Festîvala Fîlman a Dêrsimî do bêra serûberkerdene.

Derheqê edebîyatê kirmanckî de şewê edebîyatî do bêrê serûberkerdene û kayê tîyatroyî do bêrê mojnayene.

Bînaya şaredarîye ya newîye do ekolojîke biba. Wesayîtê şaredarîye do bêrê newekerdene. Rayîrê zîyaretgehan do bêrê viraştene. Rayîrê şîyayîşî yê Fatma Ana do bêro viraştene.