Namzedê hemserekanê şaredarîyan ê DEM Partî xeylêk şaristanan de xebatanê xo rê dewam kenê û hetê şarî ra bi coşî yenê pêşwazîkerdene

Wan de namzedanê Şaredarîya Erdîşî Gulere Temel û Baran Bîlîcîyî esnafî zîyaret kerdî û dima zî buroyê weçînayîşî de rêxistinê komelê sivîlî kerdî meymanê xo. Hemserekan tîya de vat ke ê seba weçînayîşan bihêvî yê û wina veng da: ''Bêrê ma 1ê nîsane de şaristanî qeyûman ra bixelisnê.''

Qers de taxa Îstasyonî de keyeyî ameyî zîyaretkerdene. Şarî rêxistina partîye rê gerreyê qeyûman kerd. Zîyaretan de seba beşdarîya çalakîya 8ê Adare zî veng dîya.

Erdexan de namzedê Şaredarîya Golanî Serkan Yilmazî û endamanê DEM Partî esnafî zîyaret kerdî û seba weçînayîşan destek waşt. 

Şirnex de namzedanê Şaredarîya Şaristanî Bêrîvane Kutlu û Turan Sultanî Hemserekê KCDyî Berdan Ozturkî reyde esnafî zîyaret kerdî. Şarî bi sloganê ''DEM DEMÊ ma yo'' namzedî pêşwazî kerdî.

Riha de qezaya Xelfetî de buroyê weçînayîşî ame akerdene. Cinîyî bi kincanê xo yê neteweyîyan tewrê akerdişî bîyî. Namzeda Şaredarîya Riha Gulşene Ozerî şar selam kerd. Wekîlê DEM Partî Omer Ocalanî akerdiş de qisey kerd û bale ante tecrîdê Îmraliyî ser. Ocalanî vat: ''Seba çareserîya demokratîke ganî berê Îmraliyî bêrê akerdene.'' 

Hetê bînî ra qezayanê Eyyubiye, Wêranşar, Hewag, Curnê Reş Serêkaniyê yê Riha de namzedan esnafî, keyeyî û rêxistinê komelê sivîlî zîyaret kerdî.

Namzedanê Şaredarîya Mugla Candane Susoy û Yusuf Uludagî rojnamegerî zîyaret kerdî. Namzeda Şaredarîya Bodrumî Zuhale Macît zî tewra zîyaretî bîyî.

Amed de qezaya Bajarê Nû de buroyê weçînayîşî yê cinîyan bi beşdarîya Vervatoxa Meclîsê Cinîyan ê DEM Partî Halîde Turkoglu, wekîle Ceylane Akça, Sevîlay Çelenk, Adalet Kaya ame akerdene. Akerdişî ra verî cinîyan bi deyîran govende girewte û sloganê sey “Bijî berxwadana zindanan” û “Jin, jiyan azadî” vatî. Halîde Turkoglu xîtabê cinîyan kerd û ard ziwan ke ganî cinîyî mîyanê îdareyanê herêmîyan de cabigêrê. Namzeda Şaredarîya Bajarê Nû Safîye Akdag pare kerd ke tewr zaf cinîyî bi coşî tewrê xebatanê weçînayîşan benê û vera her teda têkoşîn kenê. Namzeda Şaredarîya Sûrî Fatma Gulan Onkol zî venga pêro cinîyan da ke 8ê Adare de Meydanê Îstasyonî de tewra çalakîya Roja Cinîyan a Dinya bibê.