Leşkeranê tirkan dewa Şemse ya qezaya Heskîfî ya Êlihî de hêverî pê wezayîtanê zirxînan goristan xera kerd û dima zî tirbêko tarîxî rijna û alaya tirkan daranê goristanî de daliqnaye.

Leşkeran hewteyê verênî de zî goristan rijnabi û zerar dabi goristan. Leşkeran reyna tirbê Şêx Îbrahîmo ke tirbê ci hetê şarî ra sey fîraz yeno zanayene xera kerd û alaya tirkan daran ser o daliqnaye.

Dewijê ke waşt qedexeyê tebervejîyayîşî ra verî tirbe zîyaret bikerê, wexto ke şîyî goristan înan dî ke tirbe û goristan ameyê rijnayene û alaya tirke daranê goristanî de ameya daliqnayene.

Hemserekê Şubeyê Êlihî yê MEBYA-DERî Ahmet Yaşarî pare kerd ke roja arîfe de zî ê goran ra tehamul nêkenê û vat: ''AKP aşo xo sey dîndar dano naskerdene. La tehamulê înan pê goranê kurdan û kesanê dîndaran çin o. Yew îzehê ney çin o. Ma sey MEBYA-DERî nê hêrişî qebul nêkenê û ma do muracatê huqûqî bikerê.''