Şemzînan de netîceya verweçînayîşan de Nazdare Opengîn û Naîf Eroguz bîyî namzedê DEM Partî. Namzeda Şaredarîya Şemzînanî ya DEM Partî Nazdare Opengîn 1977 de Şemzînan de dadîya xo ra bîya. A zewijnaye ya û dadîya çar domanan a. 

Nazdare ANFyî rê qala weçînayîşanê herêmîyan kerde.

Nazdare Opengîn ard ziwan ke a seba ke turê yewinî de ameya weçînayene zaf sereberz a û vat: ''Eleqeyê şarê Şemzînan seba namzedanê DEM Partî zêde yo. Îradeyê şarê ma xurt o. Vera polîtîkayanê qeyûman û xespkerdişê îradeyî şar do ancî îradeyê xo bimojno.

Weçînayîşanê herêmîyan ra dima seba cinîyan projeyê ma est ê. Cinîyê kurdî hêzê têkoşînî yê tewr pîl ê. Bi paştdayîşê xo ma do weçînayîşan de vera ferasetê dişmenîya cinîyan têkoşîn bikerê û destkewteyanê şarî teslîmê ci bikerê. Ma nika ra bi pêro hêzê xo xebitîyenê. Şarê ma paştdayîşêkê pîlî dano ma. DEM Partî û namzedê ci her ca de bi coşî yenê pêşwazîkerdene. Ma do Şemzînan de bi paştdayîşê şarê xo AKPyî bin bivisnê.''