Hemsereka Meclîsê Sûrîyeya Demokratîke (MSD) Îlham Ehmeda ke 2 rojan ra nata Swêd de pêvînayîşanê dîplomatîkan kena, paytextê Swêdî Stockholm de kombîyayîşê çapemenîye viraşt.

Ehmede vist vîrî ke Vakur û Rojakewtena Sûrîye 9 rojan ra nata hedefê hêrişanê Tirkî yê ke tede Erebî, Kurdî,  Asûrî-Suryanî, Tirkmenî û multecîyê şeran ê verênan estî. Ehmede bale ante ke Tirkîya hêrişê herêmanê Surîye yê tewr aramênan û haştîyenan kerd û înan çend seba dîyalogî xîret kerd zî Tirkîya seba îşxalkarîye israr kerd û va: ''Rojawanî ne Tirkîya ne zî welatê bînî tehdît nêkerdî û  ê bi xo seba ke hêrişê Tirkîya nêkerî, çekê xo yê giranî tepîya antî. Ma hêvî kerdêne ke DYA hêrişê Tirkîya vindarnena, labelê hêzanê DYA ameyî tepîyaancîyene û îmkan da Tirkîya ke hêriş bike.

QSD û hêzanê Kurdan seba pawitişê şarê xo û seba ke şarê neçar mekê Rûsya û rejîmê Sûrîye reyde bazerîye kerd. Rîyê hêrişanê dewleta Tirkî ra zafê sivîlan wefat kerd. Nêzdîya 500 kesan wefat kerd û birîndar bîyî. Se hezaran merdiman erdê xo terikna. Hêzê hetkarîye yê herême pêro agêrayî. Teyarayê şerî yê dewleta Tirkî hêrişê sivîlan, binsazîya awe û elektîrîk kenî, bomabayan erzenê kovoyanê sivîlan û naye ra zafê sivîlî merdî. Nê çeteyê ke Tirkîya sey 'Artêşa Sûrîye ya Azade' dana şinasnayene, çeteyê verên ê DAÎŞ'î yê.Serêkanîyê ameye dormegirewtene, şaristan de awe û elektîrîk çin ê. Dewleta Tirkîya çekanê kîmyewî xebitnena" Ehmede veng da Neteweyê Yewbîyayeyî û dezgehan ke herême de cigêrayîş bikê. Seba Serêkanîyê ganî korîdorê merdimî bêro sazkerdene. No berpirsîyarîya NY'yî de yo. NY ganî bi berpirsîyarîya xo payan ser bibe û cade tê bigêre."