Newroza emserî bi şîarê ''Wext wextê serkewtişî yo' bi desan bajaran de ameye pîrozkerdene. Şayîyan de waştişê azadîya Rayberê Şarê Kurdî Abdullah Ocalanî ameyî waştene. Amed de hûmare yew mîlyonî ra zafêr bî. Şayîyanê Newroze de 173ê înan domanî tewr tay 488 kesî ameyî destbendkerdene.  Binyakerdişê heqan û destbendkerdişê ke Newroze de qewimîyayî tay wina yê:

Amed: Qezayan de 19 û 20ê adare de şayîyanê Newroze de bi desan kesî ameyî destbendkerdene. Şar seba ke kincê xo yê herêmkî kerdî piray nêgerîya warê şayîye. Rîyê kincanê înan ra destûr nêdîya tay hunermendî vejîye sehne. Verê şayîyanê Newroze operasyonanê qrikerdişî de xeylêk kesî bi darbkerdişî ameyî destbendkerdene. Newroza Amedî de bi des hezaran kesî nêgerîyayî warê şayîye. Polîsan pê gaz û guleyanê plastîkan hêriş kerd. Tay kesî birîndar bîyî. 150ê înan domanî 300 kesî badê şayîye ameyî destbendkerdene.

Aydin: Qezaya Efelerî de hunermendê ke tewrê şayîya Newroze bîyî Serhat Kural, Fesih Şahin, Nihat Yilmaz, Eyup Yildiz, Sedat Kement, Gokhan Olçer, Mervan Aktumur rîyê deyîranê ke vatî ra ameyî destbendkerdene. Înan ra Fesih Şahin ame tepiştene ê bînî ameyî veradayene.

Konya: Hediye Yildiz, Serhat Levent, Hamide Kaya û Resul Hocaogullari Meram seba ke pê kincanê neteweyîyan tewrê şayîya Newroze bîyî ameyî destbenkderdene.

Mêrdîn: Qezaya Qoserî de badê Newroze rayraşîyayîş ame kerdene. Polîsan hêriş kerd zafê înan domanî nizdê 30 kesan destbend kerdî. Nisêbîn de polîsan semedê destsernayîşê beyraqe hêrişê ciwana kerd la şarî verê polîsan girewt û ê fetilnayî. La badê şayîye polîsan eşt keyeyan ser û 5 kesî destbend kerdî. Gama ke polîsan kesêkî rê şîdet kerdene dîmenî înan ameyî antene.

Şirnex: Şayîya Silopî de seba ke flamayê çeqer sûre û hewzî kerdî pa 6 kesî ameyî destbendkerdene. Reyna Hemsereka HDPyî ya Şirnexî Sabuha Akdag seba ke destûr nêda serê ci bêro cigêrayene raştê şîdetê polîsan ameye.

Adana: Rojnamegerê Yeni Yaşamî Serhat Sezgin gama ke pîya bi rojnameyî waşt debikewo warê Newroze ame destbendkerdene. Reyna xeylêk kesî rîyê renganê neteweyîyan ra ameyî destbendkerdene.

Îstanbul: 5ê înan domanî 86 kesî badê şayîya Newroze ameyî destbendkerdene.

Tekirdag: Şayîya Newroze de 9 kesî badê hêrişê grûbêka faşîstan ameyî radestbendkerdene. 5 kesî zî rîyê sloganan ra ameyî destbendkerdene.

Gebze: Badê şayîya Gebze Ramazan Oter, İhsan Oter, Eyup Oter û Yusuf Demir seba ke marş wende ameyî destbendkerdene û bi îdîaya ''endamîya rêxistine'' ameyî tepiştene.

Wan: Seba ke semedê Rayberê Şarê Kurdî Abdullah Ocalanî sloganî eştî 15 kesî badê şayîye ameyî destbendkerdene. Qezaya Erdîşî de zî badê şayîye polîsan eşt keyeyan ser û 5 kesî destbend kerdî.

Agirî: Şayîye ra dima 10 kesî rîyê sloganan ra ameyî destbendkerdene.

Gever: Endamêkê/a Grûba syan Ateşi ame/ye destbendkerdene.