Amed de wextê Newroza 2015î ya ke deklerasyonê Rayberê Şarê Kurdî Abdullah Ocalanî ame wendene ra nata reya verêne Newroza biheybeta winayêne ameye vînayene. Şaro ke barîkatê polîsan rijnayî û resa warê Newroze hûmara ci mîlyonêkî ra ravêrte. Newroze de mesajê waştişê azadîya Rayberê Şarê Kurdî Abdullah Ocalanî vejîyayî vernî. Şarê kurdî pê kincanê xo yê trodîsyonkîyan û renganê xo yê neteweyîyan çeqer, sûre û hewzî meydanê şayîyî xemilna û bi slogana ''Bijî Serok Apo'' erd û asmênî zimnayî.

Hemserekê KCDyî Berdan Ozturkî ke şayîye de qisey kerd qetilkerdişê Kemal Kurkutî vist vîrî û vat: ''Qetilkarî mehkemeyan de sey bêcûsî ameyî îlankerdene. Ma sûcdaran nas kenê, no sîstem o, sîstemo faşîst sûcdar o. Şima do hesab bidê şarê kurdî. Ez şexsê Kemal Kurkutî de heme şehîdanê Newroze bi hurmet yad kena.

Ozturkî Planê çokdayîşî yo ke 2014 de ame kombîyayîşê Heyetê Asayîşî yê Mîllî de qerarê ci ame girewtene vist vîrî û vat:  ''Êyê ke wazenê kurdan biqedinê, wa bêrê biewnî warê Newroze ra. Wa vînê ke kamî çok dayo. Şarê ma çok nêdano. Şarê ma raştê qirkerdişan ame erdî xo ra ame vetene la ewro ziwan û nasnameyê xo paweno. Şima dişmenîya kurdan kerde rayîrê xo. Meydanê Newroze qedîyayîşê înan o. Coka waştêne asteng bikerê. Dayîkê ma, ciwanê ke meydanê azadîye de ameyî têhet. Newroze semedê ma roşanê estbîyayîşî yo. Newroze semedê ma meydano ke tede mesajê tarîxî yenê dayene, o yo. Her wext wina yo.  Rayîro ke şima tira şinê rayîr nîyo. Şima semedê xeletîye kerdo xo çeng.  Vengê Birêz Ocalanî bi vengê haştîye, seycîyeyîye.  No hesabê înan nêame.  Şarê kurdî û hêzê demokrasîyî benê hezdar. Îqtîdarê înan kewt tehluke.  Dest pê şer û îşxalî kerd. Rojawan û Başûr de hêrişê îşxalî dewam kenê. Şima do Efrîn û Başûrê Kurdîstanî ra vejîyê. Şarê ma do bibo azad. Kurdîstan do bibo azad.''

Ozturkî wina dewam kerd: ''Meşirê berê Putin û Bidenî. Ameyoxê Tirkîya meroşê. Kurdî do têkoşînî rê dewam bikerê. Rayberê Şarê Kurdî rayîr mojna kurdan. Mefteyê haştîye, azadîye û demokrasîyî destê Birêz Ocalanî de yo.  Xeletî caverdê. Şima bi waştişê tesfîyekerdişê kurdan ameye nuqtaya tesfîyekerdişî. Şarê kurdî çok nêda, biewnî tîya nê meydan de yo. Meseleya kurdî ganî bêro çareserkerdene.

Partîye muxalefetî zî vanê rayîrê haştîye Amedî ra ravêreno. Merdim biney şarmîyen. 7 serrî yo Kurdîstan de zulm ke nêqewimîya nêmend. Mesut Yilmaz, Suleyman Demirel, Tayyîp Erdogan pêro ameyî şîyî. Ma nê qalan rê mirdê. Zûran caverdê. Rayîrê demokrasî û azadîye Îmrali ra ravêreno.  Ne xo ne zî şarê kurdî bixapînê.  Kurdan zaf rey şans da şima. Bêrê ronişê, semedê meseleya kurdî gama mehkeme bierzê. Rojê verênî ravêrtî. Şima hinî nêeşkenê çewî bixapînê. Na Newroze 'Newroza nika  wextê serkewtişî yo' ya. Na Newroze Newroza azadîye ya Birêz Ocalanî ya. Newroze pîroz bo.''