Kurdîstan de bi rojan o şayîyê Neroze dewam kenê. Şayîyê ke emser bi şîarê ''Wext wextê serkewtişî yo'' yenê kerdene de azadîya Rayberê Şarê Kurdî Abdullah Ocalanî yena waştene û yeno vengdayene ke wa semedê haştîye bêrê Îmraliyî bêrê akerdene.

Wêranşar

Wêranşarê Riha de bi tewrbîyayîşê wekîlanê HDPyî yê Riha Ayşe Surucu û Nusrettin Maçin û des hezar kesan Neroze ameye pîrozkerdene. Şayîye de xoverdayîşê Emine Şenyaşar ame selamkerdene û ame vatene êyê ke kenê ke HDPyî biqefilnê waranê Newroze ra cewabê înan ame dayene.

Mûş

Mûş de zî şar vejîya kuçeyan vera zulmî mesajê xoverdayîşî dayî. Wekîla HDPyî ya Mûşî Gulîstane Kiliç Koçyigit, Hemşaredara Edişî Dîba Keskîna ke wezîfeyê ci ame xespkerdene, DBP, TJA, Dayîkê Haştîye û bi hezaran kesî tewrê şayîye bîyî.

Gever

Qelaya xoverdayîşî Geverê Şirnexî de zî Newroze goreyê manaya xo yena pîrozkerdene. Şar rixmê serd û sipî meydanan de waştişê azadîye ano ziwan û wayîrê Rayberê Şarê Kurdî Abdullah Ocalanî vejîyeno.

Cizîre

Cizîra Botan de zî bi se hezaran kesî ameyî têhet. Warê Newroze ra vengê ''Bê Serek cuye nêbena'' bi berz. Qiseykerdişan de ame vatene kurdî sey tim do ewro ra tepîya zî vera zulmî xover bidê û ser bikewê.

Nisêbîn

Nisêbînê Mêrdînî ke sey warê xoverdayîşî yeno zanayene de şarî rengê xo yê xoverdayîşî reyna ramojna. Nisêbînijan bi kincanê xo yê herêmîyan û flamayanê çeqer, sûre û hewzan sloganî eştî û wayîrê Rayberîya xo vejîyayî. Şayîye de xoverdayîşê zîndanan zî ame selamkerdene. Polîsan hêrişê ciwanan kerd la şarî xover da polîsî peyser qeldayî.

Sêrt

Sêrtî de zî Newroze bi coşêkê pîlî ameye pîrozkerdene. Warê Newroze ra semedê haştîye ame vengdayene û ame waştene ke wa bêrê Îmraliyî bêrê akerdene.

Agirî

Agirî de zî ewro adirê Newroze ame wekerdene. Bi hezaran kesê ke tewê şayîya Newroze bîyî bi sloganan azadîya Abdullah Ocalanî waşte û dormeyê adirî de govenda azadîye girewte.

Çelê

Qezaya Çelê ya Colemêrgî de zî badê şeş serran adirê Newroze ame tavistene. Şarê Çelê ke meydanê şayîye bi renganê xo xemilna semedê çareserî Îmrali nîşan da û roşanê xo bi coşî pîroz kerd.