Emser Newroze bi şîarê 'Wext wextê serkewtişî yo' yena fîrazkerdene. Xeylêk şaristananê Vakurê Kurdîstanî de şayîyê Newroze bi coşî ameyî kerdene.

Waranê Newroze de azadîya Rayberê Şarê Kurdî Abdullah Ocalanî ameye waştene, tepişteyê nêweş û sîyasîyî ameyî selamkerdene û vera hêrişanê îqtîdarê AKP-MHPyî mesajê xoverdayîş û têkoşînî ameyî dayene Cinîyî tewr vernî de bi kincanê herêmîyan tewrê şayîyan bîyî. Girseyan rixmê hewayê serdî û varayîşê vewre zî govende girewte, adirê Newroze vist ta.

Riha

Riha de bi des hezaran kesan Newroze fîraz kerde. Warê Newroze de fotografê keyeyê Şenyaşarî ameyî daliqnayene. Şayîye de Merale Daniş Beştaş û sîyasetmedaran adirê Newroze vist ta. Wekîlanê HDPyî Nusrettîn Maçîn û Omer Ocalanî şayîye de qisey kerd û înan da zanayene ke Abdullah Ocalan îradeyê kurdan o û ganî tecrîdê Îmraliyî bêro wedaritene. Şayîye pê deyîranê Erdogan Emîr û govendan qedîyaye.

Semsûr

Semsûr de taxa Mîmar Sînanî de Newroze ameye fîrazkerdene. Polîsan şayîye de destûr nêda ke pankarta Kemal Kurkutî bêra kiriştene la rixmê ney zî girseyî pankarte kirişte. Şayîye de cinîyan adirê Newroze vist ta. Wekîla HDPyî Huda Kaya û Endamê MYKyê HDPyî Turgut Okerî şayîye de seba caardişê yewîya neteweyîye veng da. Şayîye pê tîlîlî û çepikan qedîyaye.

Gumgum

Şayîya Elbîstanî ya Gumgumî de Wekîlê HDPyî Zeynel Ozen, Hemserekê HDPyî yê Gumgumî amade bîyî. Polîsan waşt mudaxeleyê fotografanê Rayberê Şarê Kurdî bikerê. Rixmê mudaxele û ablukaya polîsan zî girseyî fotografî daliqnayî. Zeynel Ozenî qiseykerdişê xo de bale ante dewaya qefilnayîşê HDPyî ser û vat ke ê do xoverdayîşê xo rê dewam bikerê.

Silopî

Şayîya Silopî ya Şirnexî de vera sloganê 'Biciwîyo Serek Apo' ame vatene.  Girseyî şayîye de pê dahol û zirnayan govende girewte û Mayanê Haştîye adirê Newroze vist ta. Wekîlanê HDPyî Huseyîn Kaçmaz, Hasan Ozguneş û Nurane Îmîr şayîye de qisey kerd û înan ard ziwan ke Newroze azadî, nasname û destkewteyê kurdan a. Şayîye de pê sloganan tecrîd û tedayê vera tepişteyan ameyî şermezarkerdene. Şayîye de hunermendî Hîvron, Cevdet Bagca û Talat Yeşîl vejîyayî sehne ser.

Mêrdîn

Qezaya Dêrikî de bi beşdarîya Wekîlanê HDPyî PEroye Dundar, Ebruye Gunay, sîyasetmedar ahmet Turk, Rêxistina HDP û DBPyî NEwroze ameye fîrazkerdene. Şayîyan de mesajê xoverdayîşî ameyî dayene. Qiseykerdişan ra dima adirê Newroze ame tavistene. Qezaya Stewrê de zî Newroze ameye fîrazkerdene. 

Dîlok 

Warê şayîya Dîlokî pê fotografanê Kemal Kurkut û Denîze Poyraz xemilîya. Wekîlê HDPyî Mehmet Ruştu Tîryakî, Rêxistinê HDP û DBPyî tewrê şayîye bîyî.  Şayîye de seba yadkerdişê Kemal Kurkutî deqayêk rêz ame girewtene. Dima ke adirê Newroze ame tavistene girseyî pîya dormeyê adirî de govende girewte. Şayîye de koma Çiya vejîyaye sehne ser. 

Tûx

Qezaya Tûxî ya Bedlîsî de zî rixmê balûqaya polîsan bi hezaran kesî ameyî têhet Newroze bi coşî pîroz kerd.

Colemêrg

Colemêrg de zî rixmê serd û sipîrî şayîya Newroze zaf sixletî ravêrte. Şayîya Newroze de ame vatene ke şarê kurdî bêçare nîyo û mesajê yewîye ame dayene.