Newroza Amedî reyna morê xo da binê rojêka tarîxî ro. Bi se hezaran kesê ke rixmê heme astengîyan pê kincanê xo yê neteweyîyan û tîlîlîyan xo kewtê warê Newroz dormê adiri de humara înan yew mîlyonî ra ravêrte. Heta şan waştişê azadîya Rayberê Şarê Kurdî Abdullah Ocalanî ameye waştene.

Hemsereka Pêroyî ya HDPyî Pervîne Buldana ke mesajê Abdullah Ocalanî ya 2013î wende xeylêk wext bi slogana “Bijî Serok Apo” ameye çapikerdene. Qiseykerdişê Buldane wina yo:

''Şarê ma yo sînaye, dayîkê ma yê erjayeyî, ciwanê sînayeyî şima xeyr ameyî. Newropa şima pîroz bo. Ewro roşanê Newroze yo. Ewro roja wayûbiratîye ya. Newroze wa semedê şaranê dinya pîroz bo.  Ez şima hemîyan bi nameyê partîya xo selam kena. Hîrê rojî yo adirê Newroze yeno wekerdene. Ma bi nê germîyîya adirê Newroze emzanê xo yê ke zîndan de yê selam kenê. Şexsê Denîze Poyraz û Kemal Kurkutî de embazê ma yê ke dinyaya xo bedilnaye ma înan bi hurmet yad kenê û soz danê ke ma do wayîrê mîrasê înan vejîyê. Newroze ganîbîyayîş o. Eynî wextî de hêvî ya, wayûbiratîye, cesaret o. Newroze pîroz bo.

Ewro şarê Amedî reyna tarîx nuşt. Şima Newroze de reyna ramojna ke milê xo çewî rê çewt nêkenê û tarîx nuşt. No tarîx do bibo xarîtaya rayîrî ya haştîye û edaletî. Şima reyna waştişê xo yê haştîye ard ziwan. Wa her kes hole biewno û mesajê ke tîya ra dîyeno rind biwano. Anaqara wa nê meydanî bivîno. Anqra wa Amedî bivîno. Şima pê nasname û kulturê xo reyna vera qedexeyan vejîyayî. Şima reyna ramojna ke bi  înkar, qeyûm, zîndan û qirkerdişê çew nêeşkeno ma biqedîno. Na seserre pê derd û kulî ravêrt la ma do destûr mede ke yewna seserre wina şiro. 9 serrî verî nê meydan de metnê mutabakatî ame wendenê. Deklerasyonê  Birêz Ocalanî yo ke 2013 de tîya ame wendene ma sey HDPyî wayîrê ci vejîyenê. Îqtîdaro ke çareserî ra teseno, ma pêrune dî ke welat ard çi hal. Nê îqtîdarî haştîye rê tecrîd kerd. Wayûbiratîya şaran  rê, nasname û ziwanê ma rê tecrîd kerd. Ma soz danê ke ma do nê îqtîdaro ke vera sîyasetê demokratîkî yo, bidê war. No meydan ramojneno şa ma tecrîdê serê Birêz Ocalanî qebûl nêkenê. Şer dej û hesir o; haştîye cuye ya, ameyox û hêvî ya. Nika wextê haştîya pîle yo.

8ê Adare de cinîyê ke vejîyayî kuçeyan bi tîlîlîyanê xo ramojna ke ê çok nêdanê. Hîrê rojî yo her hetê welatî de bi mîlyonan reyna mojna şima ma şima rê milê xo çewt nêkenê, verê şima de çok nêdanê. Rixmê heme zextan ma çirey peyser game nêerzene.  Ma nêtersenê, qerardar semedê haştîye têkoşîn kenê. Ma sey HDPyî 7ê êlula 2021î de deklarasyonê xo eşkera kerd. Ma peyê nê deklarasyonî de yê. Ma tîya ra reyna veng danê bêrê ma pêro pîya meselayanê xo çareser bikerê. Reyna Newroze pîrzo bo.

Badê qiseykerdişê Buldane warê Newroze ke yew mîlyonî zafêr kesî tede yê ra vengê “Bijî Serok Apo” bi berz.