Amedijî hewtî ra heta hewtay ewro Parka Newroze de ameyî têhet û roşanê xo pîroz kenê. Newroza Amedî ya ke bi şîarê 'Wext wextê serkewtişî yo' yena kerdene de vengê “Bijî Serok Apo” beno berz.

Rixmê provokasyonê polîsan şarê Amedî peyser game nêeşte qerardar verê xo da warê Newroze. Wekîlê HDPyî kewtê binate ke şayî bêro dest pêkerdene la provokasyon û astengkerdişê polîsan dewam kerd. Naye sero Vervatoxa Meclîsê Cinîyan ê HDPyî Ayşe Acar Başaran Mudirîya Asayîşê Amedî hîşyar kerd. Başaranê vat: ''Ma ewro tîya bi coşî Newroze do pîroz bikerê. Ewro roşanê ma yo û ma do nê meydanî de adirê Newroze tafînê. Ma pawenê heta ke heme embazê bêrê. Beran akerê wa şarê ma bêro. Hetê asayîşî ra tersê ma şarî ra çîn o. Ma pîya govende genê. Eke şima meverdê şarê ma bêro warê Newroze ma do heme kuçeyanê Amedî biaçarnê warê Newroze.''

Seba ke astengîyan dewam kerd barîkatê polîsan reyna ameyî rijnayene. Polîsî mecbur mendî ke peyser binacîyê. Newroze bi slogana ''Biciwîyo Serek Apo'' dest pêkerde. Serekê Komîteya Amadekarîye û Hemserekê HDPyî yê Bajarî Zeyat Ceylanî Newroze pîroz kerde û vat: ''Newroze estbîyayîş o, vera zulmî xoverdayîş o. Heta ke na herre de zulm bibo ma do xover bidê. Amed xoverdayîş o. Êyê ke vanê 'ma îradeyê kurdan şiknenê' wa rind biewnî Amedî ra. Çew nêeşkeno îradeyê ma bişikno.''

Şayîye bi deyîranê Hozan Kazoyî dewam kerd û şarî dest pê govende kerd.Dima ra Grûba Îttîfaqê Kurdîstanî vejîyaye sehne û şar selam kerd. Sîyasetmedarê kurdî Amehmet Turk zî xoverdayîşê şarî selam kerd û vat: ''Înanê ke waştêne vengê kurdan bibirnê, zaf xelitîyayî. Ewro vengê kurdan zafêr berz beno. Ma semedê ameyoxê kurdan payan ser ê. Wa şarê ma weş û war bo. Şexsê Birêz Ocalanî de şarê ma rê tecrîd yeno kerdene. Panc serrî yo tecrîd xorîyêr bîyo. Şarê kurdî do nê sîyasetî pûç vejo.''