Wextê şayîya Amedî ya Newroze de cinî û domanî zî tede 298 kesî ameyî destbendkerdene. Bahaneya polîsan zî 'kincê neteweyî' bîye.  

Endamê Heyetê Rayberdişî yê Baroyê Amedî Avûkat Dîyar Çetedîrî vist vîrî ke seba şayîye destûr amebi girewtene û kincê neteweyî qedexe nîyê.

Çetedîrî vat: ''Rayraşîyayîş, kombîyayîş û nawnayîşî heqê qanûnî yê. Bi kêfî destbendkerdişê merdiman îşkence yo. Xora wextê destbendkerdişî de merdiman rê îşkence zî ame kerdene. Na polîtîka hîna şora rewşe bena xirabêr û huqûq do bi temamî bêro betalkerdene.''

Çetedîrî da zanayene ke domanê ke ameyê destbendkerdene zafê înan 12 serre ra qijêr ê û vat: ''Qanûno 15. yê Qanûnê Pawitişê Domanan vano ke nêbeno ke domanê 15 serre ra qijêrî bêrê destbendkerdene. Rixmê ney zî domanî ameyî destbendkerdene. Îfadeyê domanan nêame girewtene, rojêke nezaret de mendî û dima domanî vera dîyayî. Wextê destbendkerdiş û dima  domanan rê îşkence û kerdişê xirabî ameyî kerdene.''