Komeleya Rojnamegeranê Dîcle û Firatî (DFG) raporê menga nîsan eşkera kerd. DFGyî pare kerd ke nîsane de 9 rojnamegerî ameyî destbendkerdene, derheqê 5 rojnamegeran de dewa ameye akerdene, 17 xeberî, 17 websîteyî ameyî astengkerdene û 60 rojnamegerî ameyî muhakemekerdene.

DFGyî da zanayene ke teda û astengîya vera rojnamegeran her roje zêdîyena. DFGyî bale ante Qerarnameyê Mudirîya Pêroyî ya Asayîşî ser û ard ziwan ke qerarname armanc keno ke karê rojnamegerîye û çapemenîye asteng bikero. DFGyî vat: ''Qerarname girewtişê dîmenanê polîsan sey 'îhlalê cuya taybete ya polîsan' mojneno. La nê qeydan zaf serebûtî roşnî kerdî. Mîsal; eke Newroza 2017î de fotografê hêrişê vera Kemal Kurkutî serebût sey 'bombaya gandare' biameyêne vatene.  Rojnamegerî pê raştîyan komel roşnî kenê. ''

DFGyî  3ê Gulane Roja Azadîya Rojnamegerîye ya pêro rojnamegeran fîraz kerde.

DFGyî raporê xo de nê doneyî pare kerdî: de 9 rojnamegerî ameyî destbendkerdene, derheqê 5 rojnamegeran de dewa ameye akerdene, 17 xeberî, 17 websîteyî ameyî astengkerdene û 60 rojnamegerî ameyî muhakemekerdene, derheqê 2 rojnamegeran de tehqîqatî ameyî akerdene, 5 cezayê RTUKî ameyî dayene û 70 rojnamegerî zîndanan de tepişte yê.