Rayberîya Înîsîyatîfê Ocalanî rê Azadîye de 25ê hezîrana 2012î ra nata şaristanê Strasbourgî yê Fransa de seba azadîya Rayberê Şarê Kurdî Abdullah Ocalanî çalakîya 'Nobeta Azadîye' yena kerdene. Çalakîye hewteyê 502. de ya.

No hewte endamanê Merkezê Komelê Demokratîkî yê Kurdan ê Bernî yê Swîsre çalakîye dewr girewte. Kome de kurdîstanijî Nûsret Demîr, Erkan Serhad û Kerem Ozer ca gênê.

Nusret Demîrî nameyê kome ser o qisey kerd û vat: ''Rayberê ma bi komployêkê mîyanneteweyî ame esîrkerdene. Şarê kurdî bi hawayêkê tarîxî 24 serran vera ney têkoşîn keno. Heta ke Rayberê ma azad nêbo, ma zî do azad nêbê.''

Demîrî venga dewletanê Ewropa da ke wa mebê hemparê sûcanê dewleta tirke yê vera Rayberê Şarê Kurdî û şarê kurdî.

Demîrî vat: ''Heta ke Rayberê ma azad bibo ma do têkoşînê xo rê dewam bikerê.'' Demîrî venga pêor kurdîstanijan da ke wayîrê na çalakîye vejîyê.