Nobeta Edaletî ya merdimanê tepişteyan çarçewa Hemleya ''Abdullah Ocalanî rê Azadîye, Meseleya Kurdan rê Çareserîya Sîyasîye'' de dewam kena.

Êlih de vizêr roja 70ine de nobetdaran pankarta ''Dadîyanê qehremanan rê hema selamî. Ma do bi hêzê xo tecrîdî bişiknê û cuya azade awan bikerê'' ameye akerdene. Hemserekê DBPyî Keskîn Bayindirî, Wekîla DEM Partî Zeynepe Oduncu û Hemşaredara Êlihî Gulîstane Sonuk nobete zîyaret kerde.

Bayindirî îfade kerd ke ê serkêşîya dadîyan de têkoşînêkê fîrazî kenê û no têkoşîn weçînayîşanê 31ê adare de ser kewto. Bayindirî vat: ''Bi hezaran tepişteyî zîndanan de grevê vêşanîye de yê. Rayberê Şarê Kurdî, şarê ma, cinî û ciwanî xo ver danê.''

Nobete bi sloganan qedîyaye.

Mêrdîn de vizêr roja 95ine ya çalakîye de Hemşaredaran Ahmet Turk û Devrîme Demîr nobete zîyaret kerde. Çalakîye de sloganê “Bijî berxwedana zindanan'' ame berzkerdene.

Demîre bale ante girîngîya çalakîya dadîyan û dîyar kerd ke dadîyî serkêşê têkoşînî yê.

Ahmet Turkî bale ante tecrîdê zîndanan ser û vat: ''Birêz Ocalanî ra hîrê serrî yo xeberêke nêna girewtene. Kurdî têkoşînê xurtî danê, wayîrê ameyoxê xo vejîyenê. Şarê kurdî xo ver dano û tewr zaf zî dadîyî vera tecrîdî xo ver danê.''