Seba azadîya Rayberê Şarê Kurdî Abdullah Ocalanî xeylêk şaristanan de Nobetê Edaletî dewam kenê.

Êlih

Êlih de roja 67ine de bînaya DBPyî de nobete dewam kerd. Vizêr aktîvîstanê TJA, endam û îdarekaranê SBP û DEM Partî nobete zîyaret kerde. Nobete bi sloganê “Jin, Jiyan, Azadî”, “Bijî berxwedana zîndanan” û “Bê Serok jiyan nabe"qedîyaye.

Mêrdîn

Roja 92yîne de xeylêk kesan nobete zîyaret kerde. Hemsereka DEM Partî ya Mêrdînî Necla Acibuca nobete de îfade kerd ke ê tecrîdê vera Ocalanî şermezar kenê û heta ke ê Rayberê Şarê Kurdî Abdullah Ocalanî ra xeberêke bigêrê do nêvinderê.

Îzmîr

Serkêşîya EGE TUHAY DER û TJA de roja 48ine de nobete dewam kerd. Dadîya Firat Yagmekanî Sultane Yagmekan nobete de da zanayene ke ganî Abdullah Ocalan bieşko keye û avûkatanê xo bivîno. Dayîke Sultane vat: ''Ma do apey game nêerzê û nobete rê dewam bikerê.''

Mersîn

Roja 127ine de Wekîlê DEM Partî yê Mersînî Alî Bozan, Hemserekê DEM Partî yê Mersînî Reşan Aşan û xeylêk kesan nobete zîyaret kerde.

Maya Haştîye Meryeme Erbey ard ziwan ke seba çareserîya meseleya kurdan ganî Rayberê Şarê Kurdî azad bibo. Wekîl Alî Bozanî zî dîyar kerd ke tecrîd tesîrê pêro komelî keno û beno sebebê krîzan.

Dima girseyî bi wesîleya rojbîyayîşê Rayberê Şarê Kurdî Abdullah Ocalanî Parka Yilmaz Guneyî ya Akdenîzî de leyî ronayî.