Wekîlanê HDPyî vera tecrîdkerdişê Rayberê Şarê Kurdî verê Wezîrîya Edaletî de dest pê çalakîya bêwext û bêdore kerd. Wekîlanê HDPyî Gulistane Kiliç Koçyîgît û Sezaî Temellîyî derheqê babete de ANFyî rê qisey kerd.

Gulistane Kiliç Koçyîgît ard ziwan ke 2 serrî yo Abdullah Ocalanî ra xeberêke nêna girewtene û vat: ''Muracatê pêvînayîşî yê keye û avûkatan rê tim cewabo negatîf dîyeno. Heta nika cewab nêdîya muracatê partîya ma zî. Seke zanîyeno CPTyî Îmrali zîyaret kerd la ma eşnawit ke Birêz Ocalanî înan de pêvînayîş nêkerdo.Îmkanê ma çin o ke ma na agahîye sereraşt bikerê. DErheqê weşîya Ocalanî de qesawetê ma yê cidîyî est ê. Coka ganî tecrîd bêrı wedaritene û derheqê Ocalanî de agahîye bêra dayene.

Tecrîd sey metodêkê îşkenceyî şuxilîyeno. Warê neteweyî de zî û mewzuatanê neteweyî û mîyanneteweyîyan de zî tecrîd sûcê vera merdimatîye yo. Ma vanê ke ganî vera îşkenceyî ma bêveng nêmanê. Wezîrîya Edaletî û hukmatê AKPyî ganî ganûnan bîyarê ca. Wedaritişê rejîmê Îmraliyî seba demokratîkbîyayîşê welatî zaf girîng o.''

Sezaî Temellîyî îfade kerd ke gama tewr pîle ya seba demokratîkbîyayîşê Tirkîya wedaritişê tecrîdî yo. Temellîyî vat: ''Meseleyê tewr girîngî yê Tirkîya meseleya edalet, huqûq, şer û meseleya kurdan a. Nê pêro mojnenê ke Tirkîya mîyanê krîzan de ya. Çareserîya nê krîzan zî wedaritişê tecrîdî yo. Coka ma bi israrî vera tecrîdî têkoşîn kenê. Ma wazenê Birêz Ocalan cade bieşko avûkatanê xo bivîno. Na babete de xeylêk xîretê ma est ê. Hem hetê huqûqî ra hem zî hetê çalakîyan ra ma xîret kenê.

Tecrîdê Îmraliyî her cayî ra vila bîyo. Ma ewro (vizêr) verê Wezîrîya Edaletî de dest pê çalakîyanê bêdor û bêdeman kerd. Ma Nobeta Têkoşînî kenê. Ma Anqara ra heta Îstanbulî gêrîyayî binê ablûqa. Îqtîdar çalakîyan ra zî terseno. Hêzê çekdarî yê nê îqtîdarî sey hêzêkê paramîlîterî tecrîd pêro kuçeyanê Tirkîya rê vila kenê. Ma bi zorî eşkerayîya xo daye. Dima zî rojnamegerî warî ra ameyî dûrvistene.''