28ê temmuze de Amed de rayîran ser ra nuşteyê hişyarkerdişî yê bi kurdkî ameybî esteritene.

Sekreterê Pêroyî yê Şaredarîya Amedî Emrullah Gordukî derheqê babete de eşkerayîyêke daye û da zanayene ke Walî Murat Zorluogluyî 27ê temmuze de saetanê mesayî ra pey bi fermanêkê nuştekîyî waşt ke wa nuşteyî bêrê esteritene.

Şubeyê Amedî yê Komeleya Huqûqnasan a Seba Azadîye (OHD) û Baroyê Amedî derheqê boyaxkerdişê nuşteyan de muracat kerd û gerreyê ê kesanê ke nuşteyî esteritê kerd.

OHDyî muracat de vat ke nuşteyî binê kontrolê polîsan de ameyê esteritene û ganî derheqê nê polîsan de ''erkê xo hol nêkerdo, zerar dayo malanê umûmîye û şarî teşwîqê kîn û nefretî kerdo'' ra tehqîqat bêro akerdene.

Baroyê Amedî zî muracatê Serdozgerîya Komare kerd û gerreyê heman kesan kerd.