Şaristanê Frankfurtî yê Almanya de Merkezê Kulturî yê Elewîyan de nuştox Haydar Işiko ke 17ê kanûne de şi heqîya xo ame yadkerdene. Keyeyê Işikî, Hemsereka KCDK-E Fatoşe Goksungur, nuştox û sîyasetmedar Fuat Kav, hunermend Ferhat Tunç û Ozan Baran, Hemsereka Kongreya Awankerdişê Dêrsimî Hulya Yer, DKTM Frankfurt û xeylêk rojnamegerî tewrê yadkerdişî bîyî.

Hemsereka Kongreya Awankerdişê Dêrsimî Hulya Yer merasîm ke qisey kerd û vat: ''Ey peyê xo de rêçêk verda, hêvîyê ey pîl bîyî. Seba ke ma waştiş û armancanê ey bîyarê ca têkoşînê xo pîl bikerê. Ma do sey cinîyan ê kurdan waştişê ey bîyarê ca.''

Kênaya Haydar Işikî Yuksele Işik vat: ''O mamostayê ma yê pêroyînan bi, embazê mi bi. Heta peynîya emrê ci çimê ey Dêrsim ser o bîyî û seba Dêrsimî ey têkoşîn kerd.''

Hemsereka KCDK-E Fatoşe Goksungur zî ard ziwan ke têkoşînê Kurdîstanî de rol û cayê qeleme yê Işikî pîl bîyî. Goksungure îfade kerd ke ê do derheqê definkerdişî de dima eşkerayîye bidê rayaumûmîye.