Nuştox Haydar Işik vizêr başarê Munihî yê Almanya de nêweşîya kanserî ra dinyaya xo bedilnaye. Xeylêk dezgehanê kurdan ê Ewropa derheqê şehadetê Işikî de mesajî parî kerdî û dejê xo ard ziwan.

Kongreya Ronayîşî ya Dêrsimî bi eşkerayîyêke keyeyê Haydar Işiki rê serweşîye waşte û vat dejo ke ê ancene, dejê heme şarê Dêrsimî û Kurdîstanî yo. Eşkerayîye de wina ame vatene: ''Hemrayê ma Haydar Işikî seba ke qirkerdişanê dewlete yê ke cografyaya ma de kenê bifîno çiman ver çiyo ke destê ci ra ame kerd. Bi edebîyatî vera polîtîkaya qirkerdişî ya kulturkî vejîya. Kitabî û makaleyî nuştî. Qirkerdişê Dêrsimî kirişt Mehkemeya Ceza ya Mîyanneteweyîye. Rixmê nêweşîya xo têkoşînî ra dûrî nêkewt.  Seba ke Dêrsim û Kurdîstan azad nîyê wesîyet kerd ke wa bajarê Muchenî yê Almanya de bêro definkerdene. Ma do têkoşînê ey bidê domnayene.''

Dîwanê Hemserekîyê yê KCDK-E zî bi eşkerayîyêke merdimanê Işikî û şarê kurdî rê serweşîye waşte. Eşkerayîye de wina ame vatene: '' Haydar Işiki tim bi hewayêkê qerardar semedê azadîya kurdan têkoşîn kerd. Ma do keda ey xo vîr a mekerê. Roşnvîrê kurdan o neteweyî  Haydar Işik kitabê xo yê ke kirmanckî, tirkî û almankî nuştî şarê kurdî û merdimîye rê sey mîrasî verdayî.''

FEDA zî bi eşkerayîyêke dejê xo ard ziwan û serweşîye waşte. Eşkerayîye de nê ameyî parekerdene: ''Mamosteyo erjaye yê kurdan û elewîyanê kurdan  Haydar Işik rîyê zext û zilmê dewleta tirke ra nêeşka Dêrsim de mamosteyîye bikero û mecbur mend verê xo bido Ewropa. Mamosteyê ma Almanya de entegreyê sîstemî nêbi û têkoşînê Dêrsim û Kurdîstanî de cayê xo girewt û heta hela peyêne zî têkoşîn kerd.''

Mesajê Heyva Sor a Kurdîstanî zî wina ya: ''Ma pê dejê pîlî şehadetê roşnvîrê kurdan Haydar Işikî eşnawit. Haydar Işikî çirey têkoşînê azadîye û xeta xo ra tewîz nêda û bi eseranê tarîx û kulturê kurdan neslenaê ameyoxî rê kirişt. Endamanê  ma verênan ra yew o û heta ewro zî endamîya xo domna. O tim cayê mazlûman û mexduran de bi. Têkoşînê ey do tim zerrîya ma germin bikero û eserê ci zî do rayîrê ma roşn bikerê.''

YJK-E zî vatişê Haydar Işikî yê ''Wa çew mevano ke ez kîndar a, ez kurd a. Şahîdê Terteleyê Dêrsimî ya, hem zî mexdurê ci ya ke zerrîya mi dejena. Dayîka her kesî/e ci rê erjayîya.  Mi erjayeyê xo bermaye dîyî. Pê hesranê xo şar û heskerdoxanê xo yê ke raştê terteleyî ameyî rê sîya girêdayêne''vistî vîrî û vat: ''Semedê hemrayê ma Haydar Işikî dejê ma pîl o. O do tim bi tewirê xo yê bihurmetî  û esaranê xo zerrîya şarê Kurdîstanî de biciwîyo.''