Pisporanê Neteweyan ê Yewbîyayeyan derheqê Ebru Tîmtîk de eşkerayîye daye ke Tîmtîke roja 238. ya rojeyê mergî de şîye rehm. Pisporan bale ante mesuldarîya hukmatî ser û venga selahîyetdaranê tirkan da ke hesab bidê.
Derheqê avûkate Ebru Tîmtîk de ke rojeyê 238. ya rojeyê mergî de bi waştişê hukmkerdişê edîlî merde, xeylêk pisporanê Konseya Heqanê Merdiman a Neteweyan ê Yewbîyayeyan (NY) eşkerayîyêke daye.
Eşkerayîye de ame parekerdene ke dewleta tirke eşkîyayêne verê mergê Tîmtîke bigêra û ame vatene: ''Seba heqê hukmkerdişê edîlî ganî çew nêmiro.'' Eşkerayîye de pisporan vat: ''Hukmkerdişo têdûşt heqêko bingeyî yê merdimîye yo.
Pisporan vist vîrî ke Ebru Tîmtîk roja 238. ya rojeyê mergî de dinyaya xo bedilnaye û vat: ''Tepiştişê avûkatan ra dma nameyê pisporanê heqanê merdiman ê NYyî ser o ma hukmatê Tirkîya ra waşt ke sûcdarî û sebebê qanûnî yê tepişîyayîşê înan eşkera bikero. Ma bale ante destsetbendkerdişê nêqanûnî, hukmkerdişê neheqî ser. Serra 2017î de ma hukmatê Tirkîya ra waşt ke tepişîyayîş û mehkumîyetê avûkatan goreyê huqûqê mîyanneteweyî yê yan nê. Derheqê babete de selahîyetdaranê hukmatî cewab da ma la seba vergirewtişê mergê Ebru Tîmtîk hukmatî çiyo ke hewce keno, nêkerd. ''
Pisporan venga hukmatê Tirkîya da ke derheqê mergê Ebru Tîmtîk de cigêrayîşêkê bitesîrî bikero û vat: ''Ma venga selahîyetdaran danê ke prosesê hesabdayîşî bidê destpêkerdene. Ma venga hukmatê danê ke dewayanê avûkatan newe ra bidê destpêkerdene û krîterê hukmkerdişê têdûştî bîyaro ca. Ganî hukmat merdimanê ke bi hawayêkê neheqî tepişîyayî, vera bido.''
