Komeleya Huqûqnasan Seba Azadîye (OHD) 22ê çeleyê 2024î de 35 baroyan ra bi îmzayanê 330 avûkatan semedê wedaritişê tecrîdê serê Rayberê Şarê Kurdî Abdullah Ocalanî û pêvînayîşê avûkatan muracatê Wezîrîya Edaletî kerdbi.OHDyî ewro muracatê Baroyê Amedî kerd ke wa nê muracatî teqîp bikero û çîyo ke hewce keno bikero. OHDyî derheqê muracatî de eşkerayîye daye. Pîya bi avûkatanê OHDyî, avûkatê Burûyê Huqûqî yê Asrinî û Baroyê Amedî zî tewrê eşkerayîye bîyî.

Hemsereka  Pêroyî yê OHDyî Ekine Yeterî muracatê menga çeleyî vistî vîrî û vat:  ''Ma muracat kerd ke hîsgêrîye ramojne û wa selahîyetdarî eşkerayîyêk bidê la heta ewro qet cewabêk nêame dayene. Xora hetê huqûqnasan ra yeno zanayene ke tecrîdê Îmraliyî goreyê huqûqî nîyo û heme pêkerdişanê mîyanneteweyî binpay keno. Ma na bêhuqûqîye qebul nêkenê. Rîyê nê tecrîdî ra krîzê komelkî est o. Îmrali de heqê tewr esasî yenê binpaykerdene. Rayîrê çareserîye wedaritişê tecrîdê Îmraliyî yo.''

Hemserekê Pêroyî yê OHDyî Serhat Çakmakî zî nê vatî: ''Çend rojî verî Wezîrê Edaletî vatbi tecrîd çîn o, îkar kerdbi. Ê çend vajê ney zî vatişê înan tecrîdî nêşikneno. Bi serran o tecrîd est o na yew raştîye ya. Semedê wedaritişê tecrîdî gamêka fermî nêameye eştene. Ma xebatan û muracatanê xo rê dewam kenê. Baroyî zî roja verêne ra  vera tecrîdî xebatî rayra berdî. Ma înan rê spas kenê.''

Hetkarê Hemserekê Baroyê Amedî Mehdî Ozdemîrî zî vist vîrî ke Îmrali de vera Abdullah Ocalanî û tepiteyanê bînan tecrîd bêmabên dewam keno û vat: '2Heqê înanê en bingeyî yenê binpaykerdene. Ma semedê wedaritişê tecrîdî verî zî muracatê Wezîrîya Edaletî û Yewîya Baroyan a Tirkîya kerdbi ke wa na bêhuqûqîye werte ra  bêra wedaritene.''