OHDyî da zanayene ke vera tecrîdê Îmraliyî 8ê teşrîna verêne de, saete 20.00 de medyaya dîjîtale ser de çalakîye bêra kerdene. OHDyî venga pêro kesan da ke tewrê çalakîye bibê û seba qedînayîşê rejîmê Îmraliyî xîret bikerê.
Komeleya Huqûqnasanê Seba Azadîye (OHD) bi eşkerayîyêke da zanayene ke 8ê teşrîna verêne de vera tecrîdê serê Rayberê Şarê Kurdî Abdullah Ocalanî û tecrîdê serê pêro tepişteyan medyaya dîjîtale de çalakîye do bêra kerdene.
OHDyî eşkerayîya xo de vist vîrî ke Rayberê Şarê Kurdî ra 25ê adara 2021î ra nata xeberêke nêna girewtene û dewleta tirke kena ke şar tepişteyanê Îmraliyî xo vîr a bikero.
OHDyî vat: ''Ewro tecrîdê Îmraliyî vilayê pêro zîndanan bîyo, meseleya kurdan de herinda çareserîye de polîtîkayê asayîşî cagênê û Tirkîya kewta dewrêkê tarîyî. Ganî cade peynîya tecrîdê Îmraliyî bêra ardene. Ma sey OHDyî venga pêro rêxistinanê demokratîkan û rayaumûmîya demokratîke danê ke 8ê teşrîna verêne de, saete 20.00 de tewrê xebata ma ya medyaya dîjîtale bibê û vera tecrîdî veng bidê.''
