Komeleya Huqûqnasan a Seba Azadîye (OHD) derheqê grevê vêşanîye û binpaykerdişanê zîndanan sere de Amed,Wan, Îstanbul û Mersin xeylêk merkezan de eşkerayîye daye.

OHDyî Amed de bane komele de kombîyayîşê çapemenîye kerd. Pîya bi avûkatan ednamê Komeleya Paştdayîşê Keyeyanê Tepişteyan (TUAY-DER) tewrê kombîyayîşî bîyî.

Hemserekê OHDyî yê Amedî Muhharem Şahînî ard ziwan ke binpaykerdişê heqan bi ameyîşê janî dilab-hîrlab zêdîyayî. Şahînî vist vîrî ke hukmatî jan sey firsendêkî şuxulna û Qanûnê Înfazî bedilna û şertê înfazî giranêr kerdî.

Şahînî vat: ''Waştişê tepişyanê sey wa avûkat û keyeyî tepişteyan zîyaret bikerê û tepişteyê nêweşî bêrê tedawîkerdene waştişê tewr bigeyî yê heqanê merdiman ê. Nê heqî xora Qanûnê Bingeyî, Qanûnê Înfazê Ceza û pêkerdişanê mîyaneteweyî yê ke morê Tirkîya binê ci de yo tede estê. Dewlete mecbura ke nê heqan bîyaro ca. Wextê janî dî binpaykerdişê heqan zaf zêdîyayî. Goreyê raporanê Rêxistinanê Komelê Sîvîlî zîndanan de herinda tedbîranê vera Korona de no sey firsendî yeno şuxulnayene û tepişteyî bi temamî komelî ra ameyî îzolekerdene.''

Şahînî bale ante ser ke 107 zîndanan de grevê vêşanîye roja 146. de dewam kenê û wina dewam kerd: ''Eke îqtîdar waşişê tepişteyan mîyaro ca netîceya xirabe ra do berpirsîyar bo. Têna yew waştişê tepişteyan ê ke grevê vêşanîye de yê esto; wedartişê tecrîdê serê birêz Ocalanî. Tepiteyî wazenê wa keye û avûkatê ci pêvînayîş bikerê û tekîlîya ci dinyaya teberî bibo. Eke waştişê tepişteyan mero ca derheqê grevî de netîceya ke nîna waştene ra îqtîdar do perpirsîyar bo. Zîndan de ganî heqê bingeyî yê merdiman bêrê caardene. Îzahê tehlukefînayîşê cuya merdiman çîn o. Goreyê huqûq û qanûnî têgêrayîş mecburî yo. Coka sere de Wezîrîya Edaletî û dezgehê eleqedarî wa helêke cuwa ver huqûq û qanûna bîyarê ca. Ma reyna veng danê selahîyetdaran û rayapêroyîye ke wa semedê pawitişê heqê tepişteyan ê cuye hîsgêr bê.''

Bi eynî waştişî Wan, Îstanbul, Anqara, Mersin û Riha de  zî eşkerayîye ameyî dayene.