Hemdîrektorê Komeleya Xebatanê Huqûq û Medya (MLSA) Avûkat Veysel Okî derheqê asayîşê weçînayîşan de ANFyî rê qisey kerd.

Veysel Okî bale ante ser ke asayîşê weçînayîşan ganî teyna bi sindoqan sînordar nêbo û vat: ''Muxalefet vano qey bi avûkatanê serê sindoqan meseleya asayîşî çareser bena. La wina nêbeno. Seba asayîşê weçînayîşan hîrê krîterê girîngî est ê; muhakemekerdişêko xoser, azadîya propagandayan û azadîya çapemenîye. Dezgehê muhakemekerdişî îqtîdarî rê xebitîyenê, îqtîdar bi îmkananê dewlete progandayan keno. Cayanê pîlan ê sey Îstanbulî de hîle, dek û dolabî zaf nêqewimîyenê. La cayanê qijan de asayîş mesele ya. Ewro DEM Partî her cayê Tirkîya de nêeşkena bi rehetî xebatanê xo bikera. Na zî yew meseleya asayîşî ya.''

Okî îfade kerd ke partîyê sîyasîyî bi taybetî muxalefet ganî dezgeh û rêxistinanê mîyanneteweyîyan ra destek biwazê, nînan bikerê çimdaran.

Okî vist vîrî ke ê cayê ke DEM Partî tede serkewte ya, nînan de weçînitoxê sexreyî zaf ê û vat: ''Ganî teyna DEM Partî ney partîyê bînî û muxalefetî bi hawayêkê koordîneyî ney rê îtîraz bikerê. Ganî CHP, ÎYÎP, Partîya Saadetî ûsn pîya koordînasyonêkî awan bikerê. Ganî înîsîyatîfo sivîl yewna biney bêro zêdekerdene. Verê cû Tirkîya de weçînayîşan de înîsîyatîfê sivîlî est bîyê la nika partîyî teyna est ê. No zî keno ke weçînayîşî asayî nêqewimîyê.''