Serekwekîlê Koma HDPyî Saruhan Oluçî ard ziwan ke  îqtîdar xo bi polîtîkayanê şerî payra tepişeno û vat ma do vera naye vajê haştîye, muzakere û dîplomasî.

Serekwekîlê Koma Partîya Demokratîke ya Şaran  (HDP) Saruhan Oluçî derheqê Programê Têkoşînê Demokratîkî de ANFyî rê qisey kerd.

Oluçî ard ziwan ê ke netîceya nê programî ra keyfweş ê û vat: ''Ma dîyî ke hema hevî, pawitiş û coşê şarî nêqedîyo. Rixmê heme hêrişan wayîrê îredayê xo yê sîyasî vejîyeno. Şar zî şertenê zehmetan vîneno la reyna zî qerardar wayîrê amayoxê vejîyeno. Şar HDPyî ra wazeno ke polîtîkayanê hîna rêxistinkerde, qerardar û netîcegirewtoxan rayra bero. Ma rexne û vernîyazî girewtî. Kêmayîyê xo dîyî ke ma nika înan ercnenê ke werte ra wedarê.''

Oluçî vist vîrî  ke înan 31ê tebaxe de Deklarasyonê Haştîye pare kerd û vat: ''Ma her hetê komelî rê fîkrê xo yê haştîye û çareserîya demokratîke û çareserîya meselaya kurdî da zanayene. îqtîdar xo bi polîtîkayanê şerî payra tepişeno, ma vera naye vajê haştîye, muzakere û dîplomasî.''

Oluçî vatişê Erdoganî yê 'yew gule senî vay o' vist vîrî û vat: ''Ganî her kes/e wina bifikirîyo; Her guleyo ke yeno eştene, her bombaya ke yena teqnayene, her teyara ke yena wiriştene,  yenê manaya kêmîbîyayîşê nanê şarî û zafbîyayîşê bêkarîye. HDP do hetê krizê sosyal û ekonomî ra  aktîfêr rol kay bikero.''

Oluçî bale ante serê  ke Ocalanî  pêvînayîşê xo yê payênî de vat eke hewteyêk zeman bidîyo ey o do mesele çareser bikero û vat: Birêz Ocalan semedê çareserîya demokratîke û haştîye qerardar o. Tecrdî vera îradeyê çareserî yê ey de dewamkerdişê polîtîkayanê bêçareyîye yo. Tecrîd ganî bêro wadaritene.''