Serekwekîlê Koma HDPyî û wekîl Saruhan Oluçî destsernayîşê şaredarîyan sey binpaykerdişê îrdayê şarê kurdî pênase kerd. Oluçî vist vîrî ke 65 şaredarîyanê HDPyî ra 53ê ci ameyî xespkerdene û vat: ''Balkêş o ke 8 şaredarîyanê ma zî wexrê janî de seba weşîya şarî karêko cidî kerdbi. Hewteyanê peyênan de zî 5 şaredarîyanê ma rê qeyûm ame tayînkerdene û bi nê hawayî wextê janî de bi temamî dest nîya 13 şaredarîyanê ma ser. Seke ma tim vanê ê wazenê Komara Qeyûmî ya Tirkîya awan bikerê. Îradeyê şarê kurdî verê çiman de binpay kenê. 

65 şaredarîyan ra têna 12 şaredarîyî mendî. Gamê winasênî do vera nê şaredarîyan zî bêrê eştene. Îqtîdar pê qeyûman nê şaredarîyan visneno dest. ''

Oluçî bale ante operasyonê vera Komeleya Cinîyan a Rosa û DBPyî ser û vat: ''Amed de 12 kesî ameyî tepiştene. Dezgehê ke vera nînan operasyon ame kerdene, vera şîdetê cinîyan têkoşîn kenê û paştdayîşê cinîyan xurt kenê. Nêeşkenê verê têkoşînê azadî û têdûştîye yê cinîyan ê cografyaya kurdan bigêrê. Pê ney zî qîm nêkenê û Cizîre de xîret kenê ke bînaya partîya ma bivêşnê. Destê ma de dîmenê hêrişî estê. No çira Cizîre de ame kerdene? Çunke wazenê Cizîre de cewab bêro dayene. Wextê janî zî bo wexto cîya zî bo no îqtîdar tim darbe dano sîyasetê demokratîkî ro. Bi taybetî xîret keno ke HDP bêtesîr bikerê û sîyasetê demokratîk tasfîye bikero.

Ganî Îtîfaqê Demokrasîyî bêro xurtkerdene. Na çarçewe de merdimî ganî kom bibê.''