Tecrîdê serê Rayberê Şarê Kurdî Abdullah Ocalanî dewam keno. Hetê bînî ra seba ke Serekkomarê Tirkî Erdoganî Hemserekê Pêroyî yê HDPyî yo verên Selahattîn Demîrtaş hedef ramojna û vat 'Oyo ke Edirne de yo do hesabê tewr pîlî bidê êyî ke Îmrali de yo' nêrazîbîyayîşî zêdîyene. Birarzayê Abdullah Ocalanî û Wekîlê HDPyî yê Riha derheqê babete de ANFyî rê qisey kerd.

Omer Ocalanî vist vîrî ke pede pede prosesê vîjnayîşî nizdî beno û her kes ercnayîşanê xo meseleya kurdan ser o keno  û vat: ''Eke hesabî ra wetêr yew xorexnekerdiş hewce bikero ganî verî serekkomar û îqtîdar xo ra dest pê bikerê. Dima ra ganî berê Imraliyî bêrê akerdene keye û avûkatan reyde pêvînayîşî bêrê kerdene ke fîkrê Birêz Ocalanî çîyo bêro musayene. Seba ke prosesê haştîye ame hebakerdene ganî her kes xo ra dest pê xorexnekerdişî bikero. Wa no hesabanê sîyasîyan rê malzeme nêbo. Tîya berpirsîyarîya tewr pîle ê hukmat û serekkomarê ci Erdoganî ya. Prosesê haştîye xeymê Erdoganî de nîyo, o têna hesabê vîjnayîşî keno. Erdogan bi xorîkerdişî tecrîdê Îmraliyî dano domnayene.''

Omer Ocalanî derheqê îdîayanê pêvînayîşî dewam kenê de zî vat: ''Eke çîyo winayên esto ganî Abdullah Ocalan deklare bikero. Ma zî nêzanê nika Imrali de se beno. Ma nêzanê rewşa ci senîn a. Derheqê pêvînayîşan de ma çîyêk nêzanê la senî ke eseno dewerê verê ma de na rewşe do zafrê bibo rojdem. Tîya çîyo ke etîk nîyo heqê qiseykerdişî nêdîyeno Abdullah Ocalanî û derheqê ey de yeno qiseykerdene.  Abdullah Ocalanî ra ber her kes qisey keno.  Abdullah Ocalan binê tecrîdî de yo keyeyê xo zî nêvîneno la her kes derheqê ci de qisey keno. No ne hetê sîyasîyî ra ne zî hetê ehleqî ra etîk o. Meseleya kurdan tim rojdem de cayê xo gena ke muhatabê ci yo verên Abdullah Ocalan o la ey ra de her kes derheqê babete qisey keno. Erdogan semedê îqtîdarî her çî keno. Têna wazeno îqtîdar de bimano.  Eke game winayênî semedê cîyakerdişê têgêrayîşê sîyasîyî yê kurdan yenê eştene ê do naye ra çîyêk dest nêfînê. Heta ewro semedê naye zaf hamleyî ameyî kerdene la kurdan heme kayê înan betal vetî. Ewro hetê sîyasetî ra no metod dewamkeno. Bitaybetî vera partîya ma herbo psîkolojîk yeno kerdene la têgêrayîşê sîyasîyî yê kurdan zaf zixm o. Pê hemleyanê ercanan çew nêeşkeno verê kurdan bîgêro.''