Wekîlê HDPyî yê Riha Omer Ocalan bale ante ser ke Rayberê Şarê Kurdî Abdullah Ocalanî reyde qet têkilîyêke nêna kerdene û waştişnameyêk da Wezaretê Edaletî.

Waştişnameyê Omer Ocalanî wina yo:

''Ma sey keyeyê Birêz Abdullah Ocalano ke Zîndanê Îmraliyî de tepişîyeno nêeşkenê ey reyde têkilîyêke ronê. Tewr peyên Îmrali de 7ê tebaxa 2019î de pêvînayîşê avûkatan amebi kerdene û nê 21 serranê tepiştetîye de têna rayêke 27ê nîsana 2020î de heqê pêvînayîşê telefonî dîya ke no pêvînayîşo peyên bi. Nê tarîxî ra dima ne keye ne zî avûkatan tira xeberêke nêgirewte. Derheqê weşîya Birêz Abdullah Ocalanî de tarîxê 14ê adara 2021î de medyaya komelkî de tay îdîayî ameyî vatene ke ma pê nê îdîayan qerqilîyenê.

Rixmê krîteranê globalan û qanûnanê neteweyîyan û rixmê pêro xîretan zî destûr nêdîyeno ke Birêz Ocalan keye û avûkatanê xo bivîno. Tay zîndanan de seba ke tecrîd wedarîyo grevê vêşanîye dîya destpêkerdene ke no grev zî vera beno krîtîk. Nê sebeban ra semed ma wazenê ke wa cade qedexeyê pêvînayîşî yê vera Birêz Ocalanî bêro wedaritene, tede pêvînayîş bêro kerdene, îdîayê derheqê weşîya ci bêrê cigêrayene û qesaweto ke nê îdîayan ra semed qewimîyeno bêro rehetkerdene.''