Endama Komîsyonê Zîndanan ê Şubeyê Îstanbulî yê ÎHDyî Hatîce Onaran derheqê rewşa tepişteyanê nêweşan de ANFyî rê qisey kerd. 

Hatîce Onaran da zanayene ke wextê prosesê çareserîye de dewlete soz dabi ke tepişteyanê nêweşan vera bida û xîretê Derbeya 15ê Temmuze ra dima zî zîndanan de binpaykerdişê heqan zêdîyayî. 

Onarane vat: ''Xîretê darbe ra dima zîndanî rayaumûmîye û rêxistinanê komelê sivîlî rê ameyî qefilnayene, zanayîş nêame parekerdene. Xora wextê janî de zî rewşa tepişteyan bîye giranêr û pêvînayîşê mewcudî zî ameyî kêmkerdene. Wextê janî de zîndanan de tedbîrî nêameyî girewtene, malzemeyê hîjyenîkî nêdîyayî tepişteyan û sewqê nêweşxaneyî ameyî astengkerdene. Nika qedexeyê pêvînayîşî wedarîyayî la zîndanan de îşkence, cigêrayîşo rût, cezayê hucreyî estê. Hînî dewlete de na hişmendîye esta ke tepişteyî qetî nêvejîyê teber. Bi nê hawayî pê cezayanê keyfîyan înfazî yenê vêşnayene.''

Onarane bale ante ser ke 2 mengan de zîndanan ra 9 cenazayî vejîyayî û na zî rewşe bi qîmî eşkera kena. Onarane vat: ''Nê tepişteyî lîsteya nêweşanê giranan de bîyî. Mîsal Halîl Guneş kanser bi. Tepiteyê sey ey vera nêdîyenê. Dezgehê Tipê Edlîyî (ATK) raporê 'eşkenê zîndan de bimanê' dano tepişteyan ke nêweşaxaneyê eqsê ATKyî raporan danê. Koçer Ozdal zî nêweşê kanserî bi û nêweşxane de mîyanê cîlan de zî amebi kelemçekerdene. Ganî heqê xatirwaştişî yê tepişteyan estbo. Dewlete wazena ke pêro welat de zîndanê Îmraliyî awan bikera. Nika zî zîndanê Tîpê S estê. 

Ewro zîndananê herêma Marmara de 100ê ci giranî 300 tepişteyê nêweşî estê. Tepişte Ergîn Aktaş nêweşo KOAHî yo û astengdar o, Serdal Yildirim de platîn esto, Cengîz Sînan Halîs Çelîj kanser o, rewşa Aysele Tugluk vera bena giranêr, Abdullah Kalay nêweşê qelb û Wernicke-Korsakoffî yo, Îsmaîl Yilmaz felç bîyo, Kemal Turanoglu û Kemal Erturk zî nêweşê Wernicke-Korsakoffî yê û Recep Çîtîkbel şîzofren o.''

Onarane îfade kerd ke seba ke rewşa tepişteyanê nêweşan biba rojdem wezîfeyêko pîl keweno milê keyeyan û pawitoxanê heqanê merdiman. Onarane vat: ''Vengê tepişteyan ma yê. Ganî keyeyî hîna bi hîsgerî bibê û derheqê binpaykerdişanê heqan de persan pers bikerê û eke çîyêkî bimusê avûkatan û dezgehan reyde pare bikerê. Tepişteyanê nêweşan şertanê xiraban de verdayîş dûştê merdimîye yo. Ganî tepişteyê nêweşî cade bêrê veradayene.''