Esma Kiliçarslan 7ê nîsane de Dêrsim de vîn bibî û meyîtê cî Gola Uzunçayirî de amebi dîyene. Wekîlê HDPyî yê Dêrsimî Alîcan Onluyî na babete arde rojdemê Meclîsî.

Onluyî ard ziwan ke cigêrayîşî bi hawayêkê cidîyî nênê kerdene û vat: ''Sey xebata cigêrayîşê Gulîstane Dokuya ke 99 rojan ra nata vînbîyaye ya vînbîyayîşê Esma Kiliçarslan de zî xebatê cigêrayîşî bi hawayêkê nîzamî û aktîfî nêameyî kerdene. Şaristanêko sey Dêrsim o ke 24 saetan pê kamerayan yeno teqîbkerdene, dormeyê ci pê kalekolan, qareqolan û noqtayanê kontrolî girewte yo cinîyî benê vîn û cigêrayîşan de nênê dîyene. Cigêrayîşanê çawişan ra nêbo beno ke meyîtê Esma Kiliçarslan nêameyêne dîyene.

Onluyî derheqê babete de Wezîrê Karanê Zereyî Suleyman Soyluyî rê  winna persa:

-Derheqê mergê Esma Kiliçarslan de tehqîqatêk yeno kerdene?

-Xebata cigêrayîşî senî û hetê kamî ra dest pê kerd?

-Xebata cigêrayîşî key qedîyaye û ça de ameye kerdene?

-Derheqê dîmenê peyênî yê Esma de destê wezaretî de zanayîşêk esto?

-Otopsîyê Esma bi hawayêkê bidetayî ame kerdene û eke ame kerdene şima detayan rayaumûmîye reyde do pare bikerê?

-Gulîstane Dokuya ke 99 rojî yo vînbîyaye ya kotî der a?