Dewleta tirke ya îşxalkere qezaya Pulurî ya Dêrsimî de operasyono leşkerî dabi destpêkerdene. 5ê kanûne de bombardumanê artêşa tirke ya îşxalkere de 8 gerîlayê HPG û YJA Starî şehîd bibîy. 

Wekîlê HDPyî yê Dêrsimî Alîcan Onluyî pare kerd ke beno ke nê operasyonî de çeka kîmyewîye ameya şuxilnayene. 

Onluyî da zanayene ke 8 cenazayî wedarîyayî Dezgehê Tipê Edlî yê Meletî û vat: ''Keyeyanê cenazayan vat ke cenazayan ser de rêçê guleyî çin o û cenazayî bîyê sîya. Keyeyan îdîa kerd ke çeka kîmyewîye şuxilîyaya. Keyeyan waşt ke na îdîa ser o muracat bikerê la selahîyetdaran înan rê gefê 'Eke şima îdîaya winasêne bîyarê ziwan ma cenazayan nêdanê' wendo. Keyeyan zî semedo ke cade cenazayanê xo bigêrê na îdîa nêarda ziwan.''

Onluyî îfade kerd ke ganî na îdîa bêra cigêrayene û vat: ''Ma zanenê ke dezgehî hê binê tesîrê Qesre de yê û ê do cigêrayîşî nêkerê. Sere de Neteweyê Yewbîyayeyî ganî dezgehê mîyannetweyî têbigêrê û na îdîa cibigêrê. Sûco winasên ê şerî ganî bêro eşkerakerdene.''

Onluyî bale ante ser ke cenazayê gerîlayan nêdîyenê keyeyan û cade yenê binerdkerdene û vat: ''Vera keyeyanê gerîlayan zulm û sûcê merdimîye yeno kerdene. Cenazayî nêdîyenê keyeyan. Key keyeyî cenaza bigêrê zî destûr nêdîyeno ke ferdê keyeyan tewrê merasîmê definkerdişî bibê. Destûr nêdîyeno ke wecîbeyê dînî bêrê caardene. Cenazayî nêmeyê şewe yenê remnayene, seke erzîyenê qulikêk de yenê binerdkerdene. Nê zî sey şuxilîyayîşê çeka kîmyewîye sûcê merdimîye yê.''