Wekîlê HDPyî yê Dêrsimî Alîcan Onluyî derheqê şewatê Dêrsimî de eşkerayîyêka nuştekîye daye.  Onluyî da zanayene ke her serra binê nameyê operasyon û asayîşî de Dêrsim de şewatî yenê vetene, selahîyetdarî şewatan rê mudaxele nêkenê û nêverdenê şarê Dêrsimî zî mudaxele bikero.

Onluyî vist vîrî ke walîtîye derheqê şewatî de vatbi 'şewatê sergirewteyî.' Onluyî vat: ''Şewatê sergirewteyî înan rê sergirewtişê sûcanê xo yê. Kesê ke medyaya dîjîtale de semedê şewatî vilakerdişî kerdî walîtîye derheqê înan de tehqîqat da destpêkerdene. A raşt gereka kam ke şewat vet û hewnakerdişê ci asteng kerd wa bêro muhakemerdene.

3 cayan de şewat dewam keno, nêrazîbîyayîşê şarî ra dima hewayî rê mudaxeleyê şewatî ame kerdene. Heta nika bi hezaran hektaran donimî bîyî wele.''

Onluyî da zanayene ke o pê Korona kewto coka nêeşkeno şoro warê şewatî. Onluyî vat: ''Ez pê qehirîyena ke nê şewatan de ez hetê şima de nîya. Kam ke semedê hewnakerdişê şewatî kede daya ez înan rê zerrî ra sipas kena.''

Hetê bînî ra Înîsîyatîfê Huner û Kulturî yê Dêrsimî zî bi eşkerayîyêke veng da welatanê Ewropa ke semedê hewayî ra mudaxalkerdişê şewatî wa hetkarî bikerê. Eşkerayîye de derheqê zengînîya koyanê Dêrsimî de û şewatanê ke bi rojan o dewam kenê de zanayîş ame dayene û veng dîya  ke wa teyarayê hewnakerdişê şewatî bêrê şawitene û ê seba hewnakerdişê şewatî Tirkîya reyde pêvînayîşanê fermîyan  bikerê.