Namzedê Hemşaredarîya Sûrî yê DEM Partî Adnan Orhanî derheqê hedef û xebatanê xo de ANFyî rê qisey kerd.

Orhanî bale ante talanê qeyûman ser û nê vatî: ''Bitaybetî warê ziwan, kultur, komel, cinî û qijan zaf ame tengkerdene. Qeyûman heqê şarî xesp kerdî. No zîhnîyeto hêrişkar hetê şarî ra nîno qebulkerdene.  Şar nêwezanê hêna îradeyê ci bêro xespkerdene. Ma wextê xebatanê xo de vînenê ke şar senî vera qeyûman hersbîyayeyo û qerardar o ke wayîrê îradeyê xo bîvejîyo. Ma do peynîya nê zîhnîyetî bîyarê, şar do newera bibo wayîrê qale. Ma do paradîgmaya partîya xo bîyarê ca. Ma do şaredarîyîya şarî bikerê. Ma do heme qeraranê xo pîya bi şarê xo bîgerê. Şar vera qeyûman serewedareno. Polîtîkayê ma zaf zelal ê, ma do xizmetê şarê xo bikerê.

Nê zîhnîyetî faşîstî kurdkî heme tabeleyan ra esterite.Verê qeyûman şaredarîya ma de fehmê zaf ziwanan bibê. Şaredarîyanê ma de reng û vengê heme şaran û bawerîyan bibê. Ma do 31ê adare de peynîya na polîtîkaya talanî û zîhnîyetê hêrişkarî bîyarê. Ma do bitaybetî Sûr de kulturê mehle ganî bitepişê. Bi polîtîkayanê taybetan kerd ke şarê qeza ra barkerdişî rê mecbûr biverdo ke kulturê mehla bêro qedînayene. Serranê peyênan de 20 hezarî ra zafêr kesî mecbûr mendke  bar bikerê şirê. Ma do şaredarîya Sûrî bikerê şaredarîya şarî.''

Adnan Orhan 1982 de Pasûrê Amedî de ameyo dinya û mezûnê Tekîlîyanê Mîyanneteweyîyî  yo. Orhano ke  keyeyêkê welatperwerî de bîyo pîl, 1994 de dewa ci ameye vêşnayene. Dima babîyê ci Selim, apê ci Hasan û dezayê ci Cengîz Orhan ameyî destbendkerdene û bi destê dewlete ameyî vînkerdene. Merdimê Orhanî dima ra kommezelan de ameyî dîyene. Orhanî bi serran Şubeyê Amedî yê Komeleya Heqanê Merdiman (ÎHD) de pawixîya heqanê merdiman kerd. Bado ke Şaredarîya Sûrî de qeyûm ame cakerdene Orhanî tîya de karê xo caverda.